Pramāṇa · Search · About · API

Taittiriyabrahmana 1.5.3

Taittirīyabrāhmaṇa 1.5.3

Language
Sanskrit

1.5.3.1

devásya savitúḥ prātáḥ prasváḥ prāṇáḥ /
váruṇasya sāyám āsavò 'pānáḥ /
yát pratīcī́naṃ prātastánāt /
prācī́nam̐ saṃgavā́t /
táto devā́ agniṣṭomáṃ níramimata /
tát tád ā́ttavīryaṃ nírmārgaḥ /
mitrásya saṃgaváḥ /
tát púṇyaṃ tejasvy áhaḥ /
tásmā tárhi paśávaḥ samā́yanti /
yát pratīcī́nam̐ saṃgavā́t //

1.5.3.2

prācī́naṃ madhyáṃdināt /
táto devā́ ukthyàṃ níramimata /
tát tád ā́ttavīryaṃ nirmārgáḥ /
bṛ́haspáter madhyáṃdinaḥ /
tát púṇyaṃ tejasvy áhaḥ /
tásmāt tárhi tékṣṇiṣṭhaṃ tapati /
yát pratīcī́naṃ madhyáṃdināt /
prācī́nam aparāhṇā́t /
táto devā́ḥ ṣoḍaśínaṃ níramimata /
tát tád ā́ttavīryaṃ nirmārgáḥ //

1.5.3.3

bhágasya_aparāhṇáḥ /
tát púṇyaṃ tejasvyáhaḥ /
tásmād aparāhṇé kumāryò bhágam icchámānāś caranti /
yát pratīcī́nam aparāhṇā́t /
prācī́nam̐ sāyā́t /
táto devā́ atirātráṃ níramimata /
tát tád ā́ttavīryaṃ nirmārgáḥ /
váruṇasya sāyám /
tát púṇyaṃ tejasvyáhaḥ /
tásmāt tárhi ná_ánṛtaṃ vadet //

1.5.3.4

brāhmaṇó vā́ aṣṭāvim̐śó nákṣatrāṇām /
samānásya_áhnaḥ páñca púṇyāni nákṣatrāṇi /
catvā́ry aślīlā́ni /
tā́ni náva /
yác ca parástān náksātrāṇāṃ yác ca_avástāt /
tā́ny ékādaśa /
brāhmaṇó dvādaśáḥ /
yá eváṃ vidvā́n saṃvatsaráṃ vratáṃ cárati /
saṃvatsaréṇa_evā́sya vratáṃ guptáṃ bhavati /
samānásya_áhnaḥ pañca púṇyāni nákṣatrāṇi /
catvā́ry aślīlā́ni /
tā́ni náva /
āgneyī́ rā́triḥ /
aindrám áhaḥ /
tā́ny ékādaśa /
ādityó dvādaśáḥ /
yá eváṃ vidvā́n saṃvatsaráṃ vratáṃ cárati /
saṃvatsaréṇa_evā́sya vratáṃ guptáṃ bhavati //

Commentaries (4)

Linked texts (3)