Pramāṇa · Search · About · API

Taittiriyabrahmana 1.5.5

Taittirīyabrāhmaṇa 1.5.5

Language
Sanskrit

1.5.5.1

ṛtám evá parameṣṭhí /
ṛtáṃ ná_atyeti kíṃ caná /
ṛté samudrá ā́hitaḥ /
ṛté bhúmir iyám̐ śritā́ /
agnís tigména śocíṣā /
tápa ā́krāntam uṣṇíhā /
śíras tápasy ā́hitam /
vaiśvānarásya téjasā /
ṛténa_asya nívartaye /
satyéna párivartaye //

1.5.5.2

tápasā_asya_ánuvartaye /
śivéna_asya_úpavartaye /
śagména_asya_abhívartaye /
tád ṛtáṃ tát satyám /
tád vratáṃ tát_śakeyam /
téna śakeyaṃ téna rādhyāsam /
yád gharmáḥ paryávartayat /
ántān pṛthivyā́ diváḥ /
agnír ī́śāna ójasā /
váruṇo dhītíbhiḥ sahá //

1.5.5.3

índro marúdbhiḥ sákhibhiḥ sahá /
agnís tigména śocíṣā /
tápa ā́krāntam uṣṇíhā /
śíras tápasy ā́hitam /
vaiśvānarásya téjasā /
ṛténa_asya nívartaye /
satyéna párivartaye /
tápasā_asya_ánuvartaye /
śivéna_asya_úpavartaye /
śagména_asya_abhívartaye //

1.5.5.4

tád ṛtáṃ tát satyám /
tád vratáṃ tát_śakeyam /
téna śakeyaṃ téna rādhyāsam /
yó asyā́ḥ pṛthivyā́s tvací /
nivartáyaty óṣadhīḥ /
agnír ī́śāna ójasā /
váruṇo dhītíbhiḥ sahá /
índro marúdbhiḥ sákhibhiḥ sahá /
agnís tigména śocíṣā /
tápa ākrāntam uṣṇíhā //

1.5.5.5

śíras tápasy ā́hitam /
vaiśvānarásya téjasā /
ṛténa_asya nívartaye /
satyéna párivartaye /
tápasā_asya_ánuvartaye /
śivéna_asya_úpavartaye /
śagména_asya_abhívartaye /
tád ṛtáṃ tát satyám /
tád vratáṃ tát_śakeyam /
téna śakeyaṃ téna rādhyāsam //

1.5.5.6

ékaṃ mā́sam údasṛjat /
parameṣṭhī́ prajā́bhyaḥ /
téna_ābhyo máha ā́vahat /
amṛ́taṃ mártyābhyaḥ /
prajā́m ánu prájāyase /
tád u te martya_amṛ́tam /
yéna mā́sā ardhamāsā́ḥ /
ṛtávaḥ parivatsarā́ḥ /
yéna té te prajāpate /
ījānásya nyávartayan //

1.5.5.7

téna_ahám asyá bráhmaṇā /
nívartayāmi jīváse /
agnís tigména śocíṣā /
tápa ā́krāntam uṣṇíhā /
śíras tápasy ā́hitam /
vaiśvānarásya téjasā /
ṛténa_asya nívartaye /
satyéna párivartaye /
tápasā_asya_ánuvartaye /
śivéna_asya_úpavartaye /
śagména_asya_abhívartaye /
tád ṛtáṃ tát satyám /
tád vratáṃ tát_śakeyam /
téna śakeyaṃ téna rādhyāsam //

Commentaries (5)

Discussed in (6)