Taittiriyabrahmana 1.5.6
Taittirīyabrāhmaṇa 1.5.6
- Language
- Sanskrit
1.5.6.1
devā́ vái yád yajñé 'kurvata /
tád ásurā akurvata /
té 'surā ūrdhváṃ pṛṣṭhébhyo ná_apaśyan /
té kéśān ágre 'vapanta /
átha śmáśrūṇi /
átha_upapakṣáu /
tátas té 'vāñca āyan /
párābhavan /
yásya_eváṃ vápanti /
ávāṅ eti //
1.5.6.2
átho párā_ivá bhavati /
átha devā́ ūrdhváṃ pṛṣṭhébhyo 'paśyan /
tá upapakṣā́v agre 'vapanta /
átha śmáśrūṇi /
átha kéśān /
tátas tè 'bhavan /
suvargáṃ lokám āyan /
yásya_eváṃ vápanti /
bhávaty ātmánā /
átho suvargáṃ lokám eti //
1.5.6.3
áthaitán mánur vaptré mithunám apaśyat /
sá śmáśrūṇy ágre 'vapata /
átha_upapakṣáu /
átha kéśān /
táto vái sa prā́jāyata prajáyā paśúbhiḥ /
yásya_eváṃ vápanti /
prá prajáyā paśúbhir mithunáir jāyate /
deva_asurā́ḥ sáṃyatta āsan /
té saṃvatsaré vyā́yacchanta /
tā́n devā́ś cāturmāsyáir evá_abhi prā́yuñjata //
1.5.6.4
vaiśvadevéna catúro māsò 'vṛñjata_índrarājānaḥ /
tā́n_śīrṣan ní ca_ávartayanta pári ca /
varuṇapraghāsáiś catúro māsò 'vṛñjata váruṇarājānaḥ /
tā́n_śīrṣán ní ca_ávartayanta pári ca /
sākamedháiś catúro māsò 'vṛñjata sómarājānaḥ /
tā́n_śīrṣán ní ca_ávartayanta pári ca /
yā́ saṃvatsará upajīvā_ā́sīt /
tā́m eṣām avṛñjata /
táto devā́ ábhavan /
párā_ásurāḥ //
1.5.6.5
yá eváṃ vidvā́m̐ś cātúrmāsyáir yájate /
bhrā́tṛvyasya_evá māsó vṛktvā́ /
śīrṣán ní ca vartáyate pári ca /
yáiṣā́ saṃvatsará upajīvā́ /
vṛṅkté tāṃ bhrā́tṛvyasya /
kṣudhā́_asya bhrā́tṛvyaḥ párābhavati /
lohitāyaséna nívartayate /
yád vā́ imā́m agnír ṛtā́v ā́gate nivartáyati /
etád eváinām̐ rūpáṃ kṛtvā́ nívartayati /
sā́ tátaḥ śváḥ_śvo bhūyasī bhávanty eti //
1.5.6.6
prájāyate /
yá eváṃ vidvā́n lohitāyaséna nívartáyate /
etád evá rūpáṃ kṛtvā́ nívartayate /
sá tátaḥ śváḥ_śvo bhū́yān bhávann eti /
prá_evá jāyate /
treṇyā́ śalalyā́ nívartayeta /
trī́ṇi_trīṇi vái devā́nām ṛddhā́ni /
trī́ṇi cchándām̐si /
trī́ṇi sávanāni /
tráya imé lokā́ḥ //
1.5.6.7
ṛddhyā́m evá tád vīryá eṣú lokéṣu prátitiṣṭhati /
yác cāturmāsyayājy ā̀tmano ná_avadyet /
devébhya ā́vṛścyeta /
catṛṣú_catṛṣu mā́seṣu nívartayeta /
parókṣam evá tád devébhya ātmáno 'vadyaty ánāvraskāya /
devā́nāṃ vā́ eṣá ā́nītaḥ /
yáś cāturmāsyayājī́ yá eváṃ vidvā́n ní ca vartáyate pári ca /
devátā evá_apyeti /
ná_asya rudráḥ prajā́ṃ paśū́n abhímanyate //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (2)
- Altindische Grammatik — Jacob Wackernagel & Albert Debrunner, German
- The Religion and Philosophy of the Veda and Upanishads — Arthur Berriedale Keith, English