Pramāṇa · Search · About · API

Taittiriyabrahmana 1.5.9

Taittirīyabrāhmaṇa 1.5.9

Language
Sanskrit

1.5.9.1

deva_asurā́ḥ sáṃyatta āsan /
sá prajā́patir índraṃ jyeṣṭháṃ putrám ápa nyàdhatta /
ná_id enam ásurā bálīyām̐so 'hanann íti /
prahrā́do ha vái kāyādhaváḥ /
virócanam̐ sváṃ putrám ápa nyàdhatta /
ná_id enaṃ devā́ ahanann íti /
té devā́ḥ prajā́patim upasamétya_ūcuḥ /
ná_arājákasya yuddhám asti /
índram ánvicchāma_íti /
táṃ yajñakratúbhir ánvaicchan //

1.5.9.2

táṃ yajñakratúbhir ná_anvavindan /
tám íṣṭibhir ánvaicchan /
tám íṣṭibhir ánvavindan /
tád íṣṭīnām iṣṭitvám /
éṣṭayo ha vái nā́ma /
tā́ íṣṭaya íty ā́cakṣate parókṣeṇa /
parókṣapriyā iva hí devā́ḥ /
tásmā etám āgnāvaiṣṇavám ékādaśakapālaṃ dīkṣanī́yaṃ níravapan /
tád apadrútya_atanvata /
tán patnīsaṃyājā́n ta úpānayan //

1.5.9.3

té tádantam evá kṛtvā́_udadravan /
té prāyaṇī́yam abhí samā́rohan /
tád apadrútya_atanvata /
tā́n_śáṃyvanta úpānayan /
té tádantam evá kṛtvā́_udadravan /
tá ātithyám abhí samā́rohan /
tád apadrútya_atanvata /
tā́n íḍānta úpānayan /
té tádantam evá kṛtvā́_udadravan /
tásmād etā́ etádantā íṣṭayaḥ sáṃtiṣṭhante //

1.5.9.4

evám̐ hí devā́ akurvata /
íti devā́ akurvata /
íty u vái manuṣyā̀ḥ kurvate /
té devā́ ūcuḥ /
yád vā́ idám uccáir yajñéna cárāma /
tán nó 'surā́ḥ pāpmā́_anuvindanti /
upām̐śu_upasádā carāma /
táthā nó 'surāḥ pāpmā́ ná_anuvetsyanti_íti /
tá upām̐śu_upasádam atanvata /
tisrá evá sāmidhenī́r anūcya //

1.5.9.5

sruvéṇa_āghārám āghā́rya /
tisráḥ párācīr ā́hutīr hutvā́ /
sruvéṇa_upasádaṃ juhavā́ñ cakruḥ /
ugráṃ váco ápāvadhīṃ tveṣáṃ váco ápāvadhīm̐ svā́hā_íti /aśanayāpipāsé ha vā́ ugráṃ vácaḥ /
énaś ca váirahatyaṃ ca tveṣáṃ vácaḥ /
etám̐ ha vā́vá tác caturdhāvihitáṃ pāpmā́naṃ devā́ apajaghnire /
tátho eváitád evaṃvíd yájamānaḥ /
tisrá evá sāmidhenī́r anū́cya /
sruvéṇa_āghārám āghā́rya //

1.5.9.6

tisráḥ párācīr ā́hutīr hutvā́ /
sruvéṇa_upasádaṃ juhoti /
ugráṃ váco ápāvadhīṃ tveṣáṃ váco ápāvadhīm̐ svāhā́_íti /
aśanayāpipāsé ha vā́ ugráṃ vácaḥ /
énaś ca váirahatyaṃ ca tveṣáṃ vácaḥ /
etám evá tát_ caturdhāvihitáṃ pāpmā́naṃ yájamāno 'pahate /
tè 'bhinī́ya_evá_ahaḥ paśúm ā́labhanta /
áhna evá tád devā́ ávartiṃ pāpmā́naṃ mṛtyúm ápajaghnire /
téna_abhinī́ya_iva rā́treḥ prā́caran /
rā́triyā evá tád devā́ ávartiṃ pāpmā́naṃ mṛtyúm ápajaghnire //

1.5.9.7

tásmād abhinī́ya_evá_ahaḥ paśúm ā́labheta /
áhna evá tád yájamānó 'vartiṃ pāpmā́naṃ bhrā́tṛvyān ápanudate /
téna_abhinī́ya_iva rā́treḥ prácaret /
rā́triyā evá tád yájamānó 'vartiṃ pāpmā́naṃ bhrā́tṛvyān ápanudate /
sá eṣá upavasathī́yé 'han dvidevatyàḥ paśúr ā́labhyate /
dvayáṃ vā́ asmím̐l loké yájamānaḥ /
ásthi ca mām̐sáṃ ca /
ásthi caivá téna mām̐sáṃ ca yájamānaḥ sám̐skurute /
tā́ vā́ etā́ḥ páñca devátāḥ /
agnī́ṣómāv agnír mitrā́váruṇau //
pañcapañcī́ vái yájamānaḥ /
tváṅ mām̐sám̐ snā́va_ásthi majjā́ /
etám evá tát pañcadhā́ vihitám ātmā́naṃ varuṇapāśā́n muñcati /
bheṣajátāyai nirvaruṇatvā́ya /
tám̐ saptábhiś chándobhiḥ prātár ahvayan /
tásmāt saptá caturuttarā́ṇi chándām̐si prātaranuvāké 'nūcyante /
tám etáyā_upasamétya_úpāsīdan /
úpa_asmai gāyatā nara íti /
tásmād etáyā vahiṣpavamāná upasádyaḥ //

Commentaries (5)

Discussed in (5)