Pramāṇa · Search · About · API

Taittiriyabrahmana 1.6.10

Taittirīyabrāhmaṇa 1.6.10

Language
Sanskrit

1.6.10.1

pratipūruṣám ékakapālān nírvapati /
jātā́ eva prajā́ rudrā́n nirávadayate /
ékam átiriktam /
janiṣyámāṇā evá prajā́ rudrā́n nirávadayate /
ékakapālā bhavanti /
ekadhā_evá rudráṃ nirávadayate /
ná_abhíghārayati /
yád abhighāráyet /
antaravacāríṇam̐ rudráṃ kuryāt /
eka_úlmukéna yanti //

1.6.10.2

tád dhí rudrásya bhāgadhéyam /
imā́ṃ díśaṃ yanti /
eṣā́ vái rudrásya dík /
svā́yām evá diśí rudráṃ nirávadayate /
rudró vā́ apaśúkāyā ā́hutyai ná_atiṣṭhata /
asáu te paśúr íti nírdiśed yáṃ dviṣyā́t /
yám evá dvéṣṭi /
tám asmai paśúṃ nírdiśati /
yádi ná dviṣyā́t /
ākhús te paśúr íti brūyāt //

1.6.10.3

ná grāmyā́n paśū́n hinásti /
ná_araṇyā́n /
catuṣpathé juhoti /
eṣá vā́ agnīnā́ṃ páḍbīśo nā́ma /
agniváty evá juhoti /
madhyaména parṇéna juhoti /
srúgd hy eṣā /
átho khálu /
antaménaivá hotavyàm /
antatá evá rudráṃ nirávadayate //

1.6.10.4

eṣá te rudra bhāgáḥ sahá svásrā_ámbikayā íty āha /
śarád vā́ asya_ámbikā svásā /
táyā vā́ eṣá hinasti /
yám̐ hinásti /
táyā_eváinam̐ sahá śamayati /
bheṣajáṃ gáva íty āha /
yā́vanta evá grāmyā́ḥ paśávaḥ /
tébhyo bheṣajáṃ karoti /
áva_amba rudrám adimahi_íty āha /
āśíṣam eváitā́m ā́śāste //

1.6.10.5

tryàmbakaṃ yajāmaha íty āha /
mṛtyór mukṣīya mā́_amṛ́tād íti vā́vá_etád āha /
útkiranti /
bhágasya līpsante /
mū́te kṛtvā́ sajanti /
yáthā jánaṃ yatè 'vasáṃ karóti /
tādṛ́g evá tát /
eṣá te rudra bhāgá íty āha nirávattyai /
ágratīkṣam ā́yanti /
apáḥ páriṣiñcati /
rudrásya_antárhityai /
prá vā́ etè 'smā́l lokā́c cyavante /
yé tryambakaiś cáranti /
ādityáṃ carúṃ púnar étya nírvapati /
iyáṃ vā́ áditiḥ /
asyā́m evá prátitiṣṭhanti //

Commentaries (4)

Linked texts (7)