Taittiriyabrahmana 1.6.6
Taittirīyabrāhmaṇa 1.6.6
- Language
- Sanskrit
1.6.6.1
deva_asurā́ḥ sáṃyattā āsan /
sò 'gnír abravīt /
máma_iyám ánīkavatī tanū́ḥ /
tā́ṃ prīṇīta /
átha_asurān abhíbhaviṣyatha_íti /
té devā́ agnáyé 'nīkavate puroḍā́śam aṣṭā́kapālaṃ níravapan /
sò 'gnír ánīkavān svéna bhāgadhéyena prītáḥ /
caturdhā_ánīkāny ajanayata /
táto devā́ ábhavan /
párā_asurāḥ //
1.6.6.2
yád agnáye 'nīkavate púroḍā́śam aṣṭā́kapālaṃ nirvápati /
agním evá_ánīkavantam̐ svéna bhágadhéyena prīṇāti /
sò 'gnír ánīkavān svéna bhāgadhéyena prītáḥ /
caturdhā_ánīkāni janayate /
asáu vā́ ādityò 'gnír ánīkavān /
tásya raśmáyó 'nīkāni /
sākám̐ sū́ryeṇa_udyatā́ nírvapati /
sākṣā́d evā́smā ánīkāni janayati /
té 'surāḥ párājitā yántaḥ /
dyā́vāpṛthivī́ úpāśrayan //
1.6.6.3
té devā́ marúdbhyaḥ sāṃtapanébhyaś carúṃ níravapan /
tā́ṃ dyā́vāpṛthivī́bhyām eva_úbhayátaḥ sámatapan /
yán marúdbhyaḥ sāṃtapanébhyaś carúṃ nirvápati /
dyā́vāpṛthivī́bhyām evá tád ubhayáto yájamāno bhrā́tṛvyān sáṃtapati /
madhyáṃdine nírvapati /
tárhi hité 'kṣniṣṭhaṃ tápati /
carúr bhavati /
sarváta eváinān sáṃtapati /
té devā́ḥ śvovijayínaḥ sántaḥ /
sárvāsāṃ dugdhé gṛhamedhī́yaṃ carúṃ níravapan //
1.6.6.4
ā́śitā evá_adya_úpavasāma /
kásya vā́ ha_ídam /
kásya vā śvó bhavitā_íti /
sá śṛtò 'bhavat /
tásya_áhutasya ná_aśnann /
ná hí devā́ áhutasya_aśnánti /
tè 'bruvan /
kásmā imám̐ hoṣyāma íti /
marúdbhyo gṛhamedhíbhya íty abruvan /
táṃ marúdbhyo gṛhamedhíbhyo 'juhavuḥ //
1.6.6.5
táto devā́ ábhavan /
párā_ásurāḥ /
yásya_eváṃ vidúṣo marúdbhyo gṛhamedhíbhyo gṛhé júhvati /
bhávaty ātmánā /
párā_asya bhrā́tṛvyo bhavati /
yád vái yajñásya pākatrā́ kriyáte /
paśavyàṃ tat /
pākatrā́ vā́ etát kriyate /
yán ná_idhmā́barhír bhávati /
ná sāmidhenī́r anvā́ha //
1.6.6.6
ná prayājā́ ijyánte /
ná_anūyājā́ḥ /
yá eváṃ véda /
paśumā́n bhavati /
ā́jyabhāgau yajati /
yajñásyaivá cákṣuṣī ná_antáreti /
marúto gṛhamedhíno yajati /
bhāgadhéyena_eváinān sámardhayati /
agním̐ sviṣṭakṛ́taṃ yajati prátiṣṭhityai /
íḍānto bhavati /
paśávo vā́ íḍā /
paśúṣv evá_upáriṣṭāt prátitiṣṭhati //