Taittiriyabrahmana 1.6.7
Taittirīyabrāhmaṇa 1.6.7
- Language
- Sanskrit
1.6.7.1
yát pátnī gṛhamedhī́yasya_aśnīyā́t /
gṛhamedhy èvá syāt /
ví tv asya yajñá ṛdhyeta /
yán ná_aśnīyāt /
ágṛhamedhī syāt /
ná_asya yajñó vyṛddhyeta /
prátiveśaṃ paceyuḥ /
tásya_aśnīyā́t /
gṛhamedhy èvá bhavati /
ná_asya yajñó vyṛdhyate //
1.6.7.2
té devā́ gṛhamedhī́yena_iṣṭvā́ /
ā́śitā abhavan /
ā́ñjata_abhyàñjata /
ánu vatsā́n avāsayan /
tébhyó 'surāḥ kṣudhaṃ prā́hiṇvan /
sā́ devéṣu lokám ávittvā /
ásurān púnar agacchat /
gṛhamedhī́yena_iṣṭvā́ /
ā́śitā bhavanti /
ā́ñjate 'bhyàñjate //
1.6.7.3
ánu vatsā́n vāsayanti /
bhrā́tṛvyāyaivá tád yájamānaḥ kṣúdhaṃ práhiṇoti /
té devā́ gṛhamedhī́yena_iṣṭvā́ /
índrāya niṣkāsáṃ nyadadhuḥ /
asmā́n evá śvá índro níhitabhāga upāvartitā_íti /
tā́n índro níhitabhāga upā́vartata /
gṛhamedhī́yena_iṣṭvā́ /
índrāya niṣkāsáṃ nídadhyāt /
índra eváinaṃ níhitabhāga upā́vartate /
gā́rhapatye juhoti //
1.6.7.4
bhāgadhéyenaivainam̐ sámardhayati /
ṛṣabhám ā́hvayati /
vaṣaṭkārá evā́sya sáḥ /
átho indriyám evá tád vīryàṃ yájamāno bhrā́tṛvyasya vṛṅkte /
índro vṛtrám̐ hatvā́ /
párāṃ parāvátam agacchat /
ápārādham íti mányamānaḥ /
sò 'bravīt /
ká idáṃ vediṣyati_íti /
tè 'bruvan marúto váraṃ vṛṇāmahai //
1.6.7.5
átha vayáṃ vedāma /
asmábhyam evá prathamám̐ havírnírupyātā íti /
tá enam ádhyakrīḍan /
tát krīḍínāṃ krīḍitvám /
yán marúdbhyaḥ krīḍíbhyaḥ prathámam̐ havír nirupyáte víjityai /
sākám̐ sū́ryeṇa_udyatā́ nírvapati /
etásmin vái loká índro vṛtrám ahan sámṛddhyai /
etád brāhmaṇāny evá páñca havī́m̐ṣi /
etád brāhmaṇa aindrāgnáḥ /
áthaiṣá aindráś carúr bhavati //
uddhāráṃ vā́ etám índra údaharata /
vṛtrám̐ hatvā́ /
anyā́su devátāsv ádhi /
yád eṣá aindráś carúr bhávati /
uddhārám evá táṃ yájamāna úddharate /
anyā́su prajā́sv ádhi /
vaiśvakarmaṇá ékakapālo bhavati /
víśvāny evá téna kármāṇi yájamānó 'varundhe //
Linked texts (1)
- Kauṣītakibrāhmaṇa — Kauṣītaki, Sanskrit