[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 1.6.9 # Taittiriyabrahmana 1.6.9 Taittirīyabrāhmaṇa 1.6.9 - **Language:** Sanskrit ### [1.6.9.1](https://indike.org/pramana/in.veda.brahmana.taittiriya.1.6.9.1) agnáye devébhyaḥ pitṛ́bhyaḥ samidhyámānāya\_ánubrūhi\_íty āha / ubháye hí devā́ś ca pitáraś ca\_ijyánte / ékām ánvāha / ékā hí pitṛṇā́m / trír ánvāha / trír hí devā́nām / āghārā́v ā́ghārayati / yajñaparúṣor ánantarityai / ná\_ārṣeyáṃ vṛṇīte / ná hótāram // ### [1.6.9.2](https://indike.org/pramana/in.veda.brahmana.taittiriya.1.6.9.2) yád ārṣeyáṃ vṛṇītá / yád dhótāram / pramā́yuko yájamānaḥ syāt / pramā́yuko hótā / tásmān ná vṛṇīte / yájamānasya hótur gopīthā́ya / ápabarhiṣaḥ prayājā́n yajati / prajā́ vái barhíḥ / prajā́ evá mṛtyór útsṛjati / ā́jyabhāgau yajati // ### [1.6.9.3](https://indike.org/pramana/in.veda.brahmana.taittiriya.1.6.9.3) yajñásyaivá cákṣuṣī ná\_antáreti / prācīnāvītī́ sómaṃ yajati / pitṛdevatyā̀ hí / eṣā\_ā́hutīḥ / páñcakṛ́tvó 'vadyati / páñca hy ètā́ devátāḥ / dvé puro'nuvākyè / yājyā̀ devátā vaṣaṭkāráḥ / tā́ evá prīṇāti / sántatam ávadyati // ### [1.6.9.4](https://indike.org/pramana/in.veda.brahmana.taittiriya.1.6.9.4) ṛtūnā́m̐ sáṃtatyai / pra\_évaibhyaḥ pū́rvayā puro'nuvākyàyā\_āha / práṇayati dvitī́yayā / gamáyati yājyàyā / tṛtī́ye vā́ itó loké pitáraḥ / áhna eváinān pū́rvayā puro'nuvākyàyā\_atyā́nayati / rā́triyai dvitī́yayā / ā\_éváinān yājyàyā gamayati / dakṣiṇatò 'vadā́ya / údaṅṅ átikrāmati vyā́vṛttyai // ### [1.6.9.5](https://indike.org/pramana/in.veda.brahmana.taittiriya.1.6.9.5) ā́ svadhā\_íty ā́śrāvayati / ástu svadhā\_íti pratyā́śrāvayati / svadhā́ náma íti váṣaṭkaroti / svadhākāró hí pitṛṇā́m / sómam ágre yajati / sómaprayājā hí pitáraḥ / sómaṃ pitṛmántaṃ yajati / saṃvatsaró vái sómaḥ pitṛmā́n / saṃvatsarám evá tád yajati / pitṛ́̄n barhiṣádo yajati // ### [1.6.9.6](https://indike.org/pramana/in.veda.brahmana.taittiriya.1.6.9.6) yé vái yájvānaḥ / té pitáro barhiṣádaḥ / tā́n evá tád yajati / pitṛ́̄n agniṣvāttā́n yajati / yé vā́ áyajvāno gṛhamedhínaḥ / té pitáro 'gniṣvāttā́ḥ / tā́n evá tád yajati / agníṃ kavyavā́hanaṃ yajati / yá evá pitṛṇā́m agníḥ / tám evá tád yajati // ### [1.6.9.7](https://indike.org/pramana/in.veda.brahmana.taittiriya.1.6.9.7) átho yáthā\_agním̐ sviṣṭakṛ́taṃ yájati / tādṛ́g evá tát / etát te táta yé ca tvā́m ánv íti tisṛ́ṣu sraktī́ṣu nídadhāti / tásmād ā́ tṛtīyāt púruṣān nā́ma nígṛhṇanti / etā́vanto hi\_íjyánte / átra pitaro yathābhāgáṃ mandadhvam íty āha / hlī́kā hí pitáraḥ / údañco níṣkrāmanti / eṣā́ vái manuṣyā̀ṇāṃ dik / svā́m evá tád díśam ánu níṣkrāmanti // ### [1.6.9.8](https://indike.org/pramana/in.veda.brahmana.taittiriya.1.6.9.8) āhavanī́yam úpatiṣṭhante / ny èvā́smai tád dhnuvate / yát saty ā̀havanī́ye / átha\_anyátra cáranti / ā́ támitor úpatiṣṭhante / agním evá\_upadraṣṭā́raṃ kṛtvā́ / pitṛ́̄n nirávadayante / ántaṃ vā́ eté prāṇā́nāṃ gacchanti / yá ā́ támitor upatíṣṭhante / susaṃdṛ́śaṃ tvā vayám íty āha // ### [1.6.9.9](https://indike.org/pramana/in.veda.brahmana.taittiriya.1.6.9.9) prāṇó vái susaṃdṛ́k / prāṇám evá\_ātmán dadhate / yójā nv ìndra te hárī íty āha / prāṇám evá púnar ayuṅkta / ákṣann ámīmadanta hi\_íti gā́rhapatyam úpatiṣṭhante / ákṣann ámīmadanta\_átha tvā\_úpatiṣṭhāmaha íti vā́va\_étád āha / ámīmadanta pitáraḥ somyā́ íty abhíprápadyante / ámīmadanta pitáró 'tha tvā\_abhíprápadyāmaha íti vā́va\_étád āha / apáḥ páriṣiñcati / mārjáyaty eváinān // ### [1.6.9.10](https://indike.org/pramana/in.veda.brahmana.taittiriya.1.6.9.10) átho tarpáyaty evá / tṛ́pyati prajáyā paśúbhiḥ / yá eváṃ véda / ápabarhiṣāv anūyājáu yajati / prajā́ vái barhíḥ / prajā́ evá mṛtyór útsṛjati / catúraḥ prayājā́n yajati / dvā́v anūyājáu / ṣáṭ sáṃpadyante / ṣáḍ vā́ ṛtávaḥ // ṛtū́n evá prīṇāti / ná pátny ánvāste / ná sáṃyājayanti / yát pátny anvā́sīta / yát saṃyājáyeyuḥ / pramā́yukā syāt / tásmān ná\_anvāste / ná sáṃyājayanti / pátniyai gopīthā́ya // ## Commentaries (4) - [Jñānayajña on the Taittirīya Brāhmaṇa (Bhaṭṭabhāskara)](https://indike.org/pramana/in.veda.brahmana.taittiriya!bhattabhaskara.29.62) — Bhaṭṭabhāskara Miśra, Sanskrit - [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana) — Sāyaṇa, Sanskrit - [Taittirīyabrāhmaṇaṭīkā](https://indike.org/pramana/in.veda.brahmana.taittiriya!taittiriyabrahmanatika) — Sanskrit - [Taittirīyabrāhmaṇakāṭhakabhāṣya](https://indike.org/pramana/in.veda.brahmana.taittiriya!bhatta-bhaskara-misra-cikaedamandana) — Bhaṭṭa Bhāskara Miśra Cikāeḍamaṇḍana, Sanskrit ## Linked texts (3) - [A Vedic Concordance](https://indike.org/pramana/ins.reference.bloomfield-1906.c6.44) — Maurice Bloomfield, English - [Vedic Index of Names and Subjects](https://indike.org/pramana/ins.reference.macdonell-keith-1912.v1.c3.s21.513) — Arthur A. Macdonell & A. Berriedale Keith, English - [History of Dharmaśāstra (Ancient and Mediaeval Religious and Civil Law in India)](https://indike.org/pramana/ins.polity.kane-1930.v5.c73.35) — P. V. Kane, English --- Source: [https://indike.org/pramana/in.veda.brahmana.taittiriya.1.6.9](https://indike.org/pramana/in.veda.brahmana.taittiriya.1.6.9) · Pramāṇa