Pramāṇa · Search · About · API

Taittiriyabrahmana 1.7.1

Taittirīyabrāhmaṇa 1.7.1

Language
Sanskrit

1.7.1.1

etád brāhmaṇāny evá páñca havī́m̐ṣi /
átha_índrāya śúnāsī́rāya puroḍā́śaṃ dvā́daśkapālaṃ nírvaptai /
saṃvatsaró vā́ índrāśúnāsī́raḥ /
saṃvatsaréṇa_evā́smā ánnam ávarundhe /
vāyavayàṃ páyo bhavati /
vāyúr vái vṛ́ṣṭyai pradāpayitā́ /
sá evā́smai vṛ́ṣṭiṃ prádāpayati /
sauryà ékakapālo bhavati /
sū́ryeṇa vā́ amúṣmim̐l loké vṛ́ṣṭir dhṛtā́ /
sá evā́smai vṛ́ṣṭiṃ níyacchati //

1.7.1.2

dvādaśagavám̐ sī́raṃ dákṣiṇā sámṛddhyai /
deva_asurā́ḥ sáṃyattā āsan /
té devā́ agním abruvan /
tváyā vīréṇa_ásurān abhíbhavāma_íti /
sò 'bravīt /
tredhā́_ahám ātmā́naṃ víkariṣya íti /
sá tredhā́_ātmā́naṃ vyàkuruta /
agníṃ tṛ́tīyam /
rudráṃ tṛ́tīyam /
váruṇaṃ tṛ́tīyam //

1.7.1.3

sò 'bravīt /
ká idáṃ turī́yam íti /
ahám íti_índro 'bravīt /
sáṃ tú sṛjāvahā íti /
táu sámasṛjetām /
sá índras turī́yam abhavat /
yád índras turī́yam ábhavat /
tád indraturīyásya_indraturīyatvám /
táto vái devā́ vyajayanta /
yád indraturīyáṃ nirupyate víjityai //

1.7.1.4

vahínī dhenúr dákṣiṇā /
yád vahínī téna_āgneyī́ /
yád gáuḥ /
téna raudrī́ /
yád dhenúḥ /
téna_aindrī́ /
yát strī́ satī́ dāntā́ /
téna vāruṇī́ sámṛddhyai /
prajā́patir yajñám asṛjata //

1.7.1.5

tám̐ sṛṣṭám̐ rákṣām̐sy ajighām̐san /
sá etā́ḥ prajā́patir ātmáno devátā niramimīta /
tā́bhir vái sá digbhyó rákṣām̐si prā́ṇudata /
yát pañcāvattī́yaṃ juhóti /
digbhyá evá tád yájamāno rákṣām̐si práṇudate /
sámūḍham̐ rákṣaḥ sáṃdagdham̐ rákṣa íty āha /
rákṣām̐sy evá sáṃdahati /
agnáye rákṣoghne svā́hā_íty āha /
devátābhya evá vijigyānā́bhyo bhágadhéyaṃ karoti /
praṣṭivāhī́ rátho dákṣiṇā sámṛddhyai //

1.7.1.6

índro vṛtrám̐ hatvā́ /
ásurān parābhā́vya /
námucim āsuráṃ na_álabhata[na_ālabhata?] /
tám̐ śacy ā̀gṛhṇāt /
táu samalabhetām /
sò 'smād abhíśunataro 'bhavat /
sò 'bravīt /
saṃdhā́m̐ sáṃdadhāvahai /
átha tvā_vaḥ srakṣyāmi /
ná mā śúṣkeṇa ná_ārdréṇa hanaḥ //

1.7.1.7

ná dívā ná náktam íti /
sá etám apā́ṃ phénam asiñcat /
ná vā́ eṣá śúṣko na_ā́rdró vyuṣṭā_āsīt /
ánuditaḥ sū́ryaḥ /
ná vā́ etád dívā ná náktam /
tásyaitásmim̐l loké /
apā́ṃ phénena śíra údavartayat /
tád enam ánvavartata /
mítradhrug íti //

1.7.1.8

sá etā́n apām ārgā́n ajanayat /
tā́n ajuhot /
táir vái sá rákṣām̐sy ápāhata /
yád apām ārgahomó bhávati /
rákṣasām ápahatyai /
eka_ulmukéna yanti /
tád dhí rákṣasāṃ bhāgadhéyam /
imā́ṃ díśaṃ yanti /
eṣā́ vái rákṣasāṃ dík /
svā́yām evá diśí rákṣām̐si hanti //

1.7.1.9

svákṛta íriṇe juhoti pradaré vā /
etád vái rákṣasām āyátanam /
svá evá_āyátane rákṣām̐si hanti /
parṇamáyena sruvéṇa juhoti /
bráhma vái parṇáḥ /
bráhmaṇā_evá rákṣām̐si hanti /
devásya tvā savitúḥ prasavá íty āha /
savitṛ́prasūta evá rákṣām̐si hanti /
hatám̐ rákṣó vadhiṣma rákṣa íty āha /
rákṣasām̐ stṛ́tyai /
yád váste tád dákṣiṇā nirávattyai /
ápratīkṣam ā́yanti /
rákṣasām antárhityai //

Commentaries (4)

Linked texts (10)