Pramāṇa · Search · About · API

Taittiriyabrahmana 1.7.10

Taittirīyabrāhmaṇa 1.7.10

Language
Sanskrit

1.7.10.1

mitrò 'si váruṇo 'si_íty āha /
maitráṃ vā́ áhaḥ /
vāruṇī́ rā́triḥ /
ahorātrā́bhyām eváinam upā́vaharati /
mitrò 'si váruṇo 'si_íty āha /
maitró vái dákṣiṇaḥ /
vāruṇáḥ savyáḥ /
vaiśvadevy ā̀míkṣā /
svám eváinau bhāgadhéyam upāvàharati /
sám aháṃ víśvair deváir íty āha //

1.7.10.2

vaiśvadevyò vái prajā́ḥ /
tā́ evá_ā́dyāḥ kurute /
kṣatrásya nā́bhir asi kṣatrásya yónir asi_íty adhīvāsám ā́stṛṇāti sayonitvā́ya /
syonā́m ā́sīda suṣádām ā́sīda_íty āha /
yathāyajúr eváitát /
mā́ tvā him̐sīn mā_mā him̐sīd íty āha_áhim̐sāyai /
níṣasāda dhṛtávrato váruṇaḥ pastyā̀sv ā́ sā́mrājyāya sukrátur íty āha /
sā́mrājyam eváinam̐ sukrátuṃ karoti /
bráhmā́3m̐ tvám̐ rājan brahmā́_asi savitā́si satyásava íty āha /
savitā́ram eváinam̐ satyásavaṃ karoti //

1.7.10.3

bráhmā́3m̐ tvám̐ rājan brahmā́_asi_índro 'si satya_ójā íty āha /
índram eváinam̐ satya_ójasaṃ karoti /
bráhmā́3m̐ tvám̐ rājan brahmā́_asi mitrò 'si suśéva íty āha /
mitrám eváinam̐ suśévaṃ karoti /
bráhmā́3m̐ tvám̐ rājan brahmā́_asi váruṇo 'si satyádharmā_íty āha /
váruṇam eváinam̐ satyádharmāṇaṃ karoti /
savitā́_asi satyásava íty āha /
gāyatrī́m eváiténa_abhivyā́harati /
índro 'si satya_ójā íty āha /
triṣṭúbham eváiténa_abhivyā́harati //

1.7.10.4

mitrò 'si suśéva íty āha /
jágatīm eváiténa_abhivyā́harati /
satyám etā́ devátāḥ /
satyám etā́ni chándām̐si /
satyám evá_avarundhe /
váruṇo 'si satyádharmā_íty āha /
anuṣṭúbham eváiténa_abhivyā́harati /
satya_anṛté vā́ anuṣṭúp /
satya_anṛté váruṇaḥ /
satya_anṛté evá_avarundhe //

1.7.10.5

ná_enam̐ satya_anṛté udité him̐staḥ /
yá eváṃ véda /
índrasya vájro 'si vā́rtraghna íti sphyáṃ práyacchati /
vájro vái sphyaḥ /
vájreṇa_evā́smā avaraparám̐ randhayati /
evám̐ hí tát_śréyaḥ /
yád asmā eté rádhyeyuḥ /
díśo 'bhy àyam̐ rā́jā_abhūd íti páñcākṣā́n práyacchati /
eté vái sárvé 'yāḥ /
áparājāyinam eváinaṃ karoti //

1.7.10.6

odanám údbruvate /
parameṣṭhī́ vā́ eṣáḥ /
yád odanáḥ /
paramā́m eváinam̐ śríyaṃ gamayati /
súślokā́3m̐ súmaṅgalā́3m̐ sátyarājā́3n íty āha /
āśiṣam eváitā́m ā́śāste /
śaunaḥśepám ā́khyāpayate /
varuṇapāśā́d eváinaṃ muñcati /
paraḥśatáṃ bhavati /
śata_ā́yuḥ púruṣaḥ śata_índriyaḥ /
ā́yuṣy evá_indriyé prátitiṣṭhati /
mārutásya ca_ékavim̐śatikapālasya vaiśvadevyái ca_āmíkṣāyā agnáye sviṣṭakṛ́te samávadyati /
devátābhir eváinam ubhayátaḥ párigṛhṇāti /
apā́ṃ náptre svā́hā_ūrjó náptre svā́hā_agnáye gṛhápataye svā́hā_íti tisrá ā́hutīr juhoti /
tráya imé lokā́ḥ /
eṣv èvá lokéṣu prátitiṣṭhati //

Commentaries (4)

Linked texts (8)