Pramāṇa · Search · About · API

Taittiriyabrahmana 1.7.2

Taittirīyabrāhmaṇa 1.7.2

Language
Sanskrit

1.7.2.1

dhātré puroḍā́śaṃ dvā́daśakapālaṃ nírvapati /
saṃvatsaró vái dhātā́ /
saṃvatsaréṇa_evā́smai prajā́ḥ prájanayati /
ánv evā́smā ánumatir manyate /
rāté rākā́ /
prá sinīvālī́ janayati /
prajā́sv evá prájātāsu kuhvā̀ vā́caṃ dadhāti /
mithunáu gā́vau dákṣiṇā sámṛddhyai /
āgnāvaiṣṇavám ékādaśakapālaṃ nírvapati /
aindrāvaiṣṇavám ékādaśakapālam //

1.7.2.2

vaiṣṇaváṃ trikapālám /
vīryàṃ vā́ agníḥ /
vīryàm índraḥ /
vīryàṃ víṣṇuḥ /
prajā́ evá prájātā vīryè prátiṣṭhāpayati /
tásmāt prajā́ vīryàvatīḥ /
vāmaná ṛṣabhó vahī́ dákṣiṇā /
yád vahī́ téna_āgneyáḥ /
yád ṛṣabháḥ //

1.7.2.3

téna_aindráḥ /
yád vāmanáḥ /
téna vaiṣṇaváḥ sámṛddhyai /
agnīṣomī́yam ékādaśakapālaṃ nírvapati /
indrāsomī́yam ékādaśakapālam /
saumyáṃ carúm /
sómo vái retodhā́ḥ /
agníḥ prajā́nāṃ prajanayitā́ /
vṛddhā́nām índraḥ pradāpayitā́ /
sóma evā́smai réto dádhāti //

1.7.2.4

agníḥ prajā́ṃ prájanayati /
vṛddhā́m índraḥ práyacchati /
babhrúr dákṣiṇā sámṛddhyai /
somāpauṣṇáṃ carúṃ nírvapati /
aindrāpauṣṇáṃ carúm /
sómo vái retodhā́ḥ /
pūṣā́ paśūnā́ṃ prajanayitā́ /
vṛddhā́nām índraḥ pradā́payitā́ /
sóma evā́smai réto dádhāti /
pūṣā́ paśū́n prájanayati //

1.7.2.5

vṛddhā́n índraḥ práyacchati /
pauṣṇáś carú bhavati /
iyáṃ vái pūṣā́ /
asyā́m evá prátitiṣṭhati /
śyāmó dákṣiṇā sámṛddhyai /
bahú vái púruṣo 'medhyám úpagacchati /
vaiśvānaráṃ dvā́daśakapālaṃ nírvapati /
saṃvatsaró vā́ agnír vaiśvānaráḥ /
saṃvatsaréṇa_eváinam̐ svadayati /
híraṇyaṃ dákṣiṇā //

1.7.2.6

pavítraṃ vái híraṇyam /
punā́ty eváinam /
bahú vái rājanyó 'nṛtaṃ karoti /
úpa jāmyái hárate /
jinā́ti brāhmaṇám /
vádaty ánṛtam /
ánṛte khálu vái kriyámāṇe váruṇo gṛhṇāti /
vāruṇáṃ yavamáyaṃ carúṃ nírvapati /
varuṇapāśád eváinaṃ muñcati /
aśvo dákṣiṇā /
vāruṇó hí devátayā_áśvaḥ sámṛddhyai //

Commentaries (4)

Linked texts (2)