Taittiriyabrahmana 1.7.3
Taittirīyabrāhmaṇa 1.7.3
- Language
- Sanskrit
1.7.3.1
ratnínām etā́ni havī́m̐ṣi bhavanti /
eté vái rāṣṭrásya pradātā́raḥ /
etè 'pādātā́raḥ /
yá evá rāṣṭrásya pradātā́raḥ /
yè 'pādātā́raḥ /
tá evā́smai rāṣṭráṃ práyacchanti /
rāṣṭrám evá bhavati /
yát samāhṛ́tya nírvapet /
áratninaḥ syuḥ /
yathāyatháṃ nírvapati ratnitvā́ya //
1.7.3.2
yát sadyó nirvápet /
yāvatīm ékena havíṣā_āśíṣam avarundhé /
tā́vatīm ávarundhīta /
anvaháṃ nírvapati /
bhúyasīm evá_āśíṣam ávarundhe /
bhū́yaso yajñakratū́n úpaiti /
bārhaspatyáṃ carúṃ nírvapati brahmáṇo gṛhé /
mukhatá evā́smai bráhma sám̐śyati /
átho bráhmann evá kṣattrám anvā́rambhayati /
śitipṛṣṭhó dákṣiṇā sámṛddhyai //
1.7.3.3
aindrám ékādaśakapālam̐ rājanyàsya gṛhé /
indriyám evá_avarundhe /
ṛṣabhó dákṣiṇā sámṛddhyai /
ādityáṃ carúṃ máhiṣyai gṛhé /
iyáṃ vā́ áditiḥ /
asyā́m evá prátitiṣṭhati /
dhenúr dákṣiṇā sámṛddhyai /
bhágāya carúṃ vāvā́tāyai gṛhé /
bhágam evā́smin dadhāti /
vícittagarbhā paṣṭhauhī́ dákṣiṇā sámṛddhyai //
1.7.3.4
nairṛtáṃ carúṃ parivṛktyài gṛhé kṛṣṇā́nāṃ vrīhīṇā́ṃ nakhánirbhinnam /
pāpmā́nam evá nírṛtiṃ nirávadayate kṛṣṇā́ kūṭā́ dákṣiṇā sámṛddhyai /
āgneyám aṣṭā́kapālam̐ senānyò gṛhé /
sénām evā́sya sám̐śyati /
híraṇyaṃ dákṣiṇā sámṛddhyai /
vāruṇáṃ dáśakapālam̐ sūtásya gṛhé /
varuṇasavám evá_avarundhe /
mahā́niraṣṭo dákṣiṇā sámṛddhyai /
mārutám̐ saptákapālaṃ grāmaṇyò gṛhé //
1.7.3.5
ánnaṃ vái marútaḥ /
ánnam evá_avarundhe /
pṛ́śnir dákṣiṇā sámṛddhyai /
sāvitráṃ dvā́daśakapālaṃ kṣattúr gṛhé prásūtyai /
upadhvastó dákṣiṇā sámṛddhyai /
āśvináṃ dvikapālám̐ saṃgrahītúr gṛhé /
aśvínau vái devā́nāṃ bhiṣájau /
tā́bhyām evā́smai bheṣajáṃ karoti /
savātyàu dákṣiṇā sámṛddhyai /
pauṣṇáṃ carúṃ bhāgadughásya gṛhé //
1.7.3.6
ánnaṃ vái pūṣā́ /
ánnam evá_avarundhe /
śyāmó dákṣiṇā sámṛddhyai /
raudráṃ gāvīdhukáṃ carúm akṣāvāpásya gṛhé /
antatá evá rudráṃ nirávadayate /
śabála údvāro dákṣiṇā sámṛddhyai /
dvā́daśa_etā́ni havī́m̐ṣi bhavanti /
dvā́daśa mā́sāḥ saṃvatsaráḥ /
saṃvatsaréna_evā́smai rāṣṭrám ávarundhe /
rāṣṭrám evá bhavati //
1.7.3.7
yán ná pratinirvápet /
ratnína āśíṣó 'varundhīrann /
prátinírvapati /
índrāya sutrā́mṇe puroḍā́śam ékādaśakapālam /
índrāya_am̐homúce /
āśíṣa evá_avarundhe /
āyán no rā́jā vṛtrahā́ rā́jā /
bhūtvā́ vṛtráṃ vadhyād íty āha /
āśíṣam eváitā́m ā́śāste /
maitrābārhaspatyáṃ bhavati /
śvetā́yai śvetávatsāyai dugdhé //
1.7.3.8
bārhaspatyé maitrám ápidadhāti /
bráhma caivā́smai kṣattráṃ ca samī́cī dadhāti /
átho bráhmann evá kṣattráṃ prátiṣṭhāpayati /
bārhaspatyéna pū́rveṇa prácarati /
mukhatá evā́smai bráhma sám̐śyati /
átho bráhmann evá kṣattrám anvā́rambhayati /
svayaṃkṛtā́ védir bhavati /
svayaṃdináṃ barhíḥ /
svayaṃkṛtá idhmáḥ /
ánabhijitasya_abhíjityai /
támsād rā́jñām áraṇyam abhíjitam /
sáivá śvetā́ śvetávatsā dákṣiṇā sámṛddhyai //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (7)
- Hiraṇyakeśiśrautasūtra — Hiraṇyakeśin, Sanskrit
- Vedic Index of Names and Subjects — Arthur A. Macdonell & A. Berriedale Keith, English
- Śrautasūtra (Āpastamba) — Āpastamba, Sanskrit
- The Inner Conflict of Tradition: Essays in Indian Ritual, Kingship, and Society — J. C. Heesterman, English
- A Vedic Concordance — Maurice Bloomfield, English
- The State in Ancient India: A Study in the Structure and Practical Working of Political Institutions in North India in Ancient Times — Beni Prasad, English
- Contributions to the History of the Hindu Revenue System — U. N. Ghoshal, English