Taittiriyabrahmana 1.7.4
Taittirīyabrāhmaṇa 1.7.4
- Language
- Sanskrit
1.7.4.1
devasuvā́m etā́ni havī́m̐ṣi bhavanti /
etā́vanto vái devā́nām̐ savā́ḥ /
tá evā́smai savā́n práyacchanti /
tá enam̐ suvante /
agnír eváinaṃ gṛhápatīnām̐ suvate /
sómo vánaspátīnām /
rudráḥ paśūnā́m /
bṛ́haspátir vācā́m /
índro jyeṣṭhā́nām /
mitráḥ satyā́nām //
1.7.4.2
váruṇo dhármapatīnām /
etád evá sarvaṃ bhavati /
savitā́ tvā prasavā́nām̐ suvatām íti hástaṃ gṛhṇāti prásūtyai /
yé devā devasúvaḥ stha_íty āha /
yathāyajúr eváitát /
mahaté kṣattrā́ya mahatá ā́dhipatyāya mahaté jā́narājyāya_íty āha /
āśíṣam eváitā́m ā́śāste /
eṣá vo bharatā rā́jā sómo 'smā́kaṃ brāhmaṇā́nām̐ rā́jā_ity āha /
tásmāt sómarājāno brāhmaṇā́ḥ /
práti tyán nāma rājyám adhāyi_íty āha //
1.7.4.3
rājyám evā́smin prátidadhāti /
svā́ṃ tanúvaṃ váruṇo aśiśred íty āha /
varuṇasavám evá_avarundhe /
śúcer mitrásya vrátyā abhūma_íty āha /
śúcim eváinaṃ vrátyaṃ karoti /
ámanmahi mahatá ṛtásya nā́ma_íty āha /
manutá eváinam /
sárve vrā́tā váruṇasya_abhūvann íty āha /
sárvavrātam eváinaṃ karoti /
ví mitrá évair árātim atā́rīd íty āha //
1.7.4.4
árātim eváinaṃ tārayati /
ásūṣudanta yajñíyā ṛténa_íty āha /
svadáyaty eváinam /
vy ù tritó jarimā́ṇaṃ na ānaḍ íty āha /
ā́yur evā́smin dadhāti /
dvā́bhyāṃ vímṛṣṭe /
dvipā́d yájamānaḥ prátiṣṭhityai /
agnīṣomī́yasya ca_ékādaśakapālasya devasuvā́ṃ ca havíṣām agnáye sviṣṭakṛ́te samávadyati /
devátābhir eváinam ubhayátaḥ párigṛhṇāti /
viṣṇukramā́n kramate /
víṣṇur evá bhūtvā_ímā́n lokā́n abhíjayati //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (2)
- A Vedic Concordance — Maurice Bloomfield, English
- The History of Indian Literature — Albrecht Weber, English