Taittiriyabrahmana 1.7.5
Taittirīyabrāhmaṇa 1.7.5
- Language
- Sanskrit
1.7.5.1
artha_ítaḥ stha_íti juhoti /
ā́hutyā_eváinā niṣkrī́ya gṛhṇāti /
átho havíṣkṛtānām evá_abhíghṛtānāṃ gṛhṇāti /
váhantīnāṃ gṛhṇāti /
etā́ vā́ apā́m̐ raṣṭrám /
rāṣṭrám evā́smai gṛhṇāti /
átho śríyam eváinam abhívahanti /
apā́ṃ pátir asi_íty āha /
mithunám evá_akaḥ /
vṛ́ṣā_asy ūrmír íty āha //
1.7.5.2
ūrmimántam eváinaṃ karoti /
vṛṣaséno 'si_íty āha /
sénām evā́sya sám̐śyati /
vrajakṣítaḥ stha_íty āha /
etā́ vā́ apā́ṃ víśaḥ /
víśam evā́smai páryūhati /
marútām ójaḥ stha_íty āha /
ánnaṃ vái marútaḥ /
ánnam evá_avarundhe /
sū́ryavarcasaḥ stha_íty āha //
1.7.5.3
rāṣṭrám evá varcasvy àkaḥ /
sūryatvacasaḥ stha_íty āha /
satyáṃ vā́ etát /
yád várṣati /
ánṛtaṃ yádātápati várṣati /
satya_anṛté evá_avarundhe /
ná_enam̐ satya_anṛté udité him̐staḥ /
yá eváṃ véda /
mā́ndā stha_íty āha /
rāṣṭrám evá brahmavarcasy àkaḥ //
1.7.5.4
vā́śāḥ stha_íty āha /
rāṣṭrám evá vaśy àkaḥ /
śákvarīḥ stha_íty āha /
paśávo vái śákvarīḥ /
paśū́n evá_avarundhe /
viśvabhṛ́taḥ stha_íty āha /
rāṣṭrám evá payasvy àkaḥ /
janabhṛ́taḥ stha_íty āha /
rāṣṭrám evá_indriyāvy àkaḥ /
agnés tejasyā̀ḥ sthá_ity āha //
1.7.5.5
rāṣṭrám evá tejasvy àkaḥ /
apā́m óṣadhīnām̐ rásaḥ stha_íty āha /
rāṣṭrám evá madhavyàm akaḥ /
sārasvatáṃ gráhaṃ gṛhṇāti /
eṣā́ vā́ apā́ṃ pṛṣṭhám /
yát sárasvatī /
pṛṣṭhám eváinam̐ samānā́nāṃ karoti /
ṣoḍaśábhir gṛhṇāti /
ṣóḍaśakalo vái púruṣaḥ /
yā́vān evá púruṣaḥ /
tásmin vīryàṃ dadhāti /
ṣoḍaśábhir juhóti ṣóḍaśábhir gṛhṇāti /
dvā́trim̐śat sáṃpadyante /
dvā́trim̐śadakṣarā_anuṣṭúk /
vā́g anuṣṭúp sárvāṇi cchándām̐si /
vācā́_eváinam̐ sárvebhiś chándobhir abhíṣiñcati //
Commentaries (5)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Taittirīyabrāhmaṇaṭīkā — Sanskrit
- Yajurbrahmaṇabhāṣya — Sāyaṇācārya, Sanskrit
Linked texts (1)
- A Vedic Concordance — Maurice Bloomfield, English