Pramāṇa · Search · About · API

Taittiriyabrahmana 1.7.6

Taittirīyabrāhmaṇa 1.7.6

Language
Sanskrit

1.7.6.1

dévīr āpaḥ sáṃ mádhumatīr mádhumatībhiḥ sṛjyadhvam íty āha /
bráhmaṇā_eváināḥ sám̐sṛjati /
ánādhṛṣṭāḥ sīdata_íty āha /
bráhmaṇā_eváināḥ sādayati /
antarā́ hótuś ca dhíṣṇiyaṃ brāhmaṇāccham̐sínaś ca sādayati /
āgneyó vái hótā /
aindró brāhmaṇāccham̐sī́ /
téjasā ca_evá_indriyéṇa ca_ubhayáto rāṣṭráṃ párigṛhṇāti /
híraṇyena_útpunāti /
ā́hutyai hí pavítrābhyām utpunánti vyā́vṛttyai //

1.7.6.2

śatámānaṃ bhavati /
śatā́yuḥ /
púruṣaś śatá_indriyaḥ /
ā́yuṣy evá_indriyé prátitiṣṭhati /
ánibhṛṣṭam asi_íty āha /
ánibhṛṣṭam̐ hy ètát /
vācó bándhur íty āha /
vācó hy eṣa bandhùḥ /
tapojā́ íty āha /
tapojā́ hy ètát /
sómasya dātrám asi_íty āha //

1.7.6.3

sómasya hy ètád dātrám /
śukrā́ vaḥ śukréṇa_útpunāmi_íty āha /
śukrā́ hy ā́paḥ /
śukrám̐ híraṇyam /
candrā́ś candréṇa_ity āha /
candrā́ hy ā́paḥ /
candrám̐ híraṇyam /
amṛ́tā amṛ́tena_íty āha /
amṛ́tā hy ā́paḥ /
amṛ́tam̐ híraṇyam //

1.7.6.4

svā́hā rājasū́yāya_íty āha /
rājasū́yāya hy ènā utpunā́ti /
sadhamā́do dyumní nīrúja etā́ íti vāruṇyā́_ṛcā́ gṛhṇāti /
varuṇasavám evá_avarundhe /
ékayā gṛhṇāti /
ekadhā́_evá yájamāne vīryàṃ dadhāti /
kṣatrásya_úlbam asi kṣatrásya yónir asi_íti tārpyáṃ ca_ūṣṇī́ṣaṃ ca práyacchati sayonitvā́ya /
ékaśatena darbhapuñjīláiḥ pavayati /
śatā́yur vái púruṣaḥ śatávīryaḥ /
ātmā́_ekaśatáḥ //

1.7.6.5

yā́vān evá púruṣaḥ /
tásmin vīryàṃ dadhāti /
dádhy āśayati /
indriyám evá_avarundhe /
udumbáram āśayati /
annā́dyasya_ávaruddhyai /
śáṣpāṇy āśayati /
súrābalim eváinaṃ karoti /
āvída etā́ bhavanti /
āvídam eváinaṃ gamayanti //

1.7.6.6

agnír eváinaṃ gā́rhapatyena_avati /
índra indriyéṇa /
pūṣā́ paśúbhiḥ /
mitrā́varuṇau prāṇāpānā́bhyām /
índro vṛtrā́ya vájram údayacchat /
sá dívam alikhat /
sò 'ryamṇáḥ pánthā abhavat /
sá ā́vinne dyā́vāpṛthivī́ dhṛtávrate íti dyā́vāpṛthivī́ úpādhāvat /
sá ābhyām evá prásūta índro vṛtrā́ya vájraṃ prā́harat /
ā́vinne dyā́vāpṛthivī́ dhṛtávrate íti yád ā́ha //

1.7.6.7

ābhyā́m evá prásūto yájamāno vájraṃ bhrā́tṛvyāya práharati /
ā́vinnā devy áditir viśvarūpī_íty āha /
iyáṃ vái devy áditir viśvarūpī́ /
asyā́m evá prátitiṣṭhati /
ā́vinno 'yám asā́v āmuṣyāyaṇò 'syā́ṃ viśy àsmín rāṣṭrá íty āha /
viśā́_éváinam̐ rāṣṭréṇa sámardhayati /
mahaté kṣatrā́ya mahatá ā́dhipatyāya mahaté jā́narājyāyā_íty āha /
āśíṣam eváitā́m ā́śaste /
eṣá vo bharatā rā́jā sómo 'smā́kaṃ brāhmaṇā́nām̐ rā́jā_íty āha /
tásmāt sómarājāno brāhmaṇā́ḥ //

1.7.6.8

índrasya vájro 'si vā́rtraghna íti dhánuḥ práyacchati víjityai /
śatrubā́dhanāḥ stha_íti_iṣū́n /
śátrūn evā́sya bādhante /
pātá mā pratyáñcaṃ pātá mā tiryáñcam anváñcaṃ mā pāta_íty āha /
tisró vái śaravyā̀ḥ /
pratī́cī tiráścy ánū́cī /
tábhya eváinaṃ pānti /
digbhyó mā pāta_íty āha /
digbhyá eváinaṃ pānti /
víśvābhyo mā nāṣṭrā́bhyaḥ pāta_íty āha /
áparimitād eváinaṃ pānti /
híraṇyavarṇāv uṣásāṃ viroká íti triṣṭúbhā bāhū́ údgṛhṇāti /
indriyáṃ vái vīryàṃ triṣṭúk /
indriyám evá vīryàm upáriṣṭād ātmán dhatte //

Commentaries (4)

Linked texts (7)