Pramāṇa · Search · About · API

Taittiriyabrahmana 1.7.7

Taittirīyabrāhmaṇa 1.7.7

Language
Sanskrit

1.7.7.1

díśo vyā́sthāpayati /
diśā́m abhíjityai /
yád anuprakrā́met /
abhí díśo jayet /
út tú mādyet /
mánasā_ánuprákrāmati /
abhí díśo jayati /
ná_unmādyati /
samídham ā́tiṣṭha_íty āha /
téja evá_avarundhe //

1.7.7.2

ugrā́m ā́tiṣṭha_íty āha indriyám evá_avarundhe /
virā́jam ā́tiṣṭha_íty āha /
annā́dyam evá_avarundhe /
údīcīm ā́tiṣṭha_íty āha /
paśū́n evá_avarundhe /
ūrdhvā́m ā́tiṣṭha_íty āha /
suvargám evá lokám abhíjayati /
ánū́jjihīte /
suvargásya lokásya sámaṣṭyai //

1.7.7.3

mārutá eṣá bhavati /
ánnaṃ vái marútaḥ /
ánnam evá_avarundhe /
ékavim̐śatikapālo bhavati prátiṣṭhityai /
yò 'raṇye 'nuvākyò gaṇáḥ /
táṃ madhyatá úpadadhāti /
grāmyáir evá paśúbhir āraṇyā́n paśū́n párigṛhṇāti /
tásmād grāmyáiḥ paśúbhir āraṇyā́ḥ paśávaḥ párigṛhītāḥ /
pṛ́thir vainyáḥ /
abhyàṣicyata //

1.7.7.4

sá rāṣṭráṃ ná_abhavat /
sá etā́ni pārthā́ny apaśyat /
tā́ny ajuhot /
táir vái sá rāṣṭrám abhavat /
yát pārthā́ni juhóti /
rāṣṭrám evá bhavati /
bārhaspatyáṃ pū́rveṣām uttamáṃ bhavati /
aindrám úttareṣāṃ prathamám /
bráhma caivā́smai kṣatráṃ ca samī́cī dadhāti /
átho bráhmann evá kṣatráṃ prátiṣṭhāpayati //

1.7.7.5

ṣáṭ purástād abhiṣekásya juhoti /
ṣáḍ upáriṣṭāt /
dvā́daśa sáṃpadyante /
dvā́daśa mā́sāḥ saṃvatsaráḥ /
saṃvatsaráḥ khálu vái devā́nāṃ pū́ḥ /
devā́nām evá púraṃ madhyató vyávasarpati /
tásya ná kútaś cana_úpāvyādhó bhavati /
bhūtā́nām áveṣṭīr juhoti /
átra_atra vái mṛtyúr jāyate /
yátra_yatraivá mṛtyúr jā́yate /
táta eváinam ávayajate /
tásmād rājasū́yena_ījānáḥ sárvam ā́yur eti /
sárve hy àsya mṛtyávo 'veṣṭāḥ /
tásmād rājasū́yena_ījānó ná_abhícaritavái /
pratyág enam abhicāráḥ stṛṇute //

Commentaries (4)

Linked texts (6)