Pramāṇa · Search · About · API

Taittiriyabrahmana 1.7.8

Taittirīyabrāhmaṇa 1.7.8

Language
Sanskrit

1.7.8.1

sómasya tvíṣir asi táva_iva me tvíṣir bhūyād íti śārdūlacarma_úpastṛṇāti /
yáiva sóme tvíṣiḥ /
yā́ śārdūlé /
tā́m evá_avarundhe /
mṛtyór vā́ eṣá várṇaḥ /
yát_śārdūláḥ /
amṛ́tam̐ híraṇyam /
amṛ́tam asi mṛtyór mā pāhi_íti híraṇyam úpāsyati /
amṛ́tam evá mṛtyór antárdhatte /
śatámānaṃ bhavati //

1.7.8.2

śata_ā́yuḥ púruṣaḥ śata_índriyaḥ /
ā́yuṣy evá_indriyé prátitiṣṭhati /
didyón mā pāhi_íty upáriṣṭād ádhinídadhāti /
ubhayáta evā́smai śárma dadhāti /
áveṣṭā dandaśū́kā íti klībám̐ sī́sena vidhyati /
dandaśū́kān evá_avayajate /
tásmāt klībáṃ dandaśū́kā dám̐śukāḥ /
nírastaṃ námuceḥ śira íti lohitāyasáṃ nírasyati /
pāpmā́nam evá námuciṃ nirávadayate /
prāṇā́ ātmánaḥ pū́rve 'bhiṣícyā íty āhuḥ //

1.7.8.3

sómo rā́jā váruṇaḥ /
devā́ dharmasúvaś ca yé /
té_te vā́cam̐ suvantāṃ té_te prāṇám̐ suvantām íty āha /
prāṇā́n evá_ātmánaḥ pū́rvān abhíṣiñcati /
yád brūyā́t /
agnés tvā téjasā_abhíṣiñcāmi_íti /
tejasvy èva syāt /
duścármā tú bhavet /
sómasya tvā́ dyumnéna_abhíṣiñcāmi_íty āha /
saumyó vái devátayā púruṣaḥ //

1.7.8.4

sváyā_eváinaṃ devátayā_abhíṣiñcati /
agnés téjasā_íty āha /
téja evā́smin dadhāti /
sū́ryasya várcasā_íty āha /
várca evā́smin dadhāti /
índrasya_indriyéṇa_íty āha /
indriyám evā́smin dadhāti /
mitrā́váruṇayor vīryèṇa_íty āha /
vīràm evā́smin dadhāti /
marútām ójasā_íty āha //

1.7.8.5

ója evā́smin dadhāti /
kṣatrā́ṇāṃ kṣatrápatir asi_íty āha /
kṣatrā́ṇām eváinaṃ kṣatrápatiṃ karoti /
áti divás pāhi_íty āha /
áty anyā́n pāhi_iti vā́vá_etád āha /
samā́vavṛtrann adharā́g údīcīr íty āha /
rāṣṭrám evā́smin dhruvám akaḥ /
ucchéṣaṇena juhoti /
ucchéṣaṇabhāgo vái rudráḥ /
bhāgadhéyena_evá rudráṃ nirávadayate //

1.7.8.6

údaṅ parétya_ágnīddhre juhoti /
eṣā́ vái rudrásya dík /
svā́yām evá diśí rudráṃ nirávadayate /
rúdra yát te kráyī páraṃ nā́ma_íty āha /
yád vā́ asya kráyī páraṃ nā́ma /
téna vā́ eṣá hinasti /
yám̐ hinásti /
ténaiváinam̐ sahá śamáyati /
tásmai hutám asi yaméṣṭam asi_íty āha /
yamā́d evā́sya mṛtyúm ávayajate //

1.7.8.7

prájāpate ná tvád etā́ny anyá íti tásyai gṛhé juhuyāt /
yā́ṃ kāmáyeta rāṣṭrám asyai prajā́ syād íti /
rāṣṭrám evā́syai prajā́ bhavati /
parṇamáyena_adhvaryúr abhíṣiñcati /
brahmavarcasám evā́smin tvíṣiṃ dadhāti /
áudumbareṇa rājanyàḥ /
ū́rjam evā́sminn annā́dyaṃ dadhāti /
ā́śvatthena váiśyaḥ /
víśam evā́smin púṣṭiṃ dadhāti /
náiyagrodhena jányaḥ /
mitrā́ṇy evā́smai kalpayati /
átho prátiṣṭhityai //

Commentaries (4)

Linked texts (4)