Taittiriyabrahmana 1.7.9
Taittirīyabrāhmaṇa 1.7.9
- Language
- Sanskrit
1.7.9.1
índrasya vájro 'si vā́rtraghna íti rátham upā́vaharati víjityai /
mitrā́váruṇayos tvā praśāstróḥ praśíṣā yunajmi_íty āha /
bráhmaṇā_eváinaṃ devátābhyāṃ yunakti /
praṣṭivāhínaṃ yunakti /
praṣṭivāhī́ vái devaratháḥ /
devarathám evā́smai yunakti /
tráyó 'śvā bhavanti /
ráthaś caturtháḥ /
dváu savyeṣṭhasārathī́ /
ṣáṭ sáṃpadyante //
1.7.9.2
ṣáḍ vā́ ṛtávaḥ /
ṛtúbhir eváinaṃ yunakti /
viṣṇukramā́n kramate /
víṣṇur evá bhūtvā_ímā́m̐l lokā́n abhíjayati /
yáḥ kṣatríyaḥ prátihitaḥ /
sò 'nvā́rabhate /
rāṣṭrám evá bhavati /
triṣṭúbhā_anvā́rabhate /
indriyáṃ vái triṣṭúk /
indriyám evá yájamāne dadhāti //
1.7.9.3
marútāṃ prasavé jeṣam íty āha /
marúdbhir evá prásūta újjayati /
āptáṃ mána íty āha /
yád evá mánasā_áipsīt /
tád āpat /
rājanyàṃ jināti /
ánākrānta evá_ākramate /
ví vā́ eṣá indriyéṇa vīryèṇa_ṛdhyate /
yó rājanyàṃ jinā́ti /
sám ahám indriyéṇa vīryèṇa_íty āha //
1.7.9.4
indriyám evá vīryàm ātmán dhatte /
paśūnā́ṃ manyúr asi táva_iva me manyúr bhūyād íti vā́rāhī upānáhāv úpamuñcate /
paśūnā́ṃ vā́ eṣá manyúḥ /
yád varāháḥ /
téna_evá paśūnā́ṃ manyúm ātmán dhatte /
abhí vā́ iyám̐ suṣuvāṇáṃ kāmayate /
tásya_īśvarā́_indriyáṃ vīryàm ā́dātoḥ /
vā́rāhī upānáhāv úpamuñcate /
asyā́ evá_antárdhatte /
indriyásya vīryàsya_ánāttyai //
1.7.9.5
námo mātré pṛthivyā́ íty āha_áhim̐sāyai /
íyad asy ā́yur asy ā́yur me dhehi_íty āha /
ū́rjam evá_ātmán dhatte /
ū́rj_asi_ū́rjaṃ me dhehi_íty āha /
ū́rjam evá_ātmán dhatte /
yúṅṅ asi várco 'si várco máyi dhehi_íty āha /
várca evá_ātmán dhatte /
ekadhā́ brahmáṇa úpaharati /
ekadhā_évá yájamāna ā́yur ū́rjaṃ várco dadhāti /
rathavimocanī́yā juhoti prátiṣṭhityai //
1.7.9.6
tráyó 'śvā bhavanti /
ráthaś caturtháḥ /
tásmāc catúr juhoti /
yád ubháu sahá_avatíṣṭhetām /
samānáṃ lokám iyātām /
sahá saṃgrahītrā́ rathavā́hane rátham ā́dadhāti /
suvargā́d eváinaṃ lokā́d antárdadhāti /
ham̐sáḥ śuciṣád íty ā́dadhāti /
bráhmaṇā_eváinam upāvahárati /
bráhmaṇā dadhāti /
áticchandasā_ā́dadhāti /
áticchandā vái sárvāṇi chándām̐si /
sárvebhir eváinaṃ chándobhir ā́dadhāti /
várṣma vā́ eṣā́ chándasām /
yád áticchandāḥ /
yád áticchandasā dádhāti /
várṣma_eváinam̐ samānā́nāṃ karoti //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (5)
- Hiraṇyakeśiśrautasūtra — Hiraṇyakeśin, Sanskrit
- A Vedic Concordance — Maurice Bloomfield, English
- Altindische Grammatik — Jacob Wackernagel & Albert Debrunner, German
- Śrautasūtra (Āpastamba) — Āpastamba, Sanskrit
- The History of Indian Literature — Albrecht Weber, English