Pramāṇa · Search · About · API

Taittiriyabrahmana 1.8.2

Taittirīyabrāhmaṇa 1.8.2

Language
Sanskrit

1.8.2.1

jāmí vā́ etát kurvanti /
yát sadyó dīkṣáyanti /
sadyáḥ sómaṃ krīṇánti /
puṇḍarisrajā́ṃ práyacchaty ájāmitvāya /
áṅgirasaḥ suvargáṃ lokáṃ yántaḥ /
apsú dīkṣātapásī prā́veśayan /
tát puṇḍarīkam abhavat /
yát puṇḍarisrajā́ṃ prayácchati /
sākṣā́d evá dīkṣātapásī ávarundhe /
daśábhir vatsataráiḥ sómaṃ krīṇāti /
dáśa_akṣarā virā́ṭ //

1.8.2.2

ánnaṃ virā́ṭ /
virā́jā_evá_annā́dyam ávarundhe /
muṣkarā́ bhavanti sa_indratvā́ya /
daśapéyo bhavati /
annā́dyasya_ávaruddhyai /
śatáṃ brāhmaṇā́ḥ pibanti /
śatá_āyuḥ púruṣaḥ śatá_indriyaḥ /
ā́yuṣy evá_indriyé prátitiṣṭhati /
saptadaśám̐ stotráṃ bhavati /
saptadaśáḥ prajā́patiḥ //

1.8.2.3

prajā́pater ā́ptyai /
prakāśā́v adhvaryáve dadāti /
prakāśám eváinaṃ gamayati /
srájam udgātré /
vy èvā́smai vāsayati /
rukmám̐ hótre /
ādityám evā́smā únnayati /
áśvaṃ prastotṛpratihartṛ́bhyām /
prājāpatyó vā́ áśvaḥ /
prajā́pater ā́ptyai //

1.8.2.4

dvā́daśa paṣṭhauhī́r brahmáṇe /
ā́yur evá_avarundhe /
vaśā́ṃ maitrāvaruṇā́ya /
rāṣṭrám evá vaśy àkaḥ /
ṛṣabháṃ brāhmaṇāccham̐síne /
rāṣṭrám evá_indriyāvy àkaḥ /
vā́sasī neṣṭāpotṛ́bhyāṃ /
pavítre evā́syaité /
sthū́ri yavācitám acchāvākā́ya /
antatá evá vváruṇam ávayajate //

1.8.2.5

anaḍvā́ham agnī́dhe /
váhnir vā́ anaḍvā́n /
váhnir agnī́t /
váhninā_evá váhni yajñásya_ávarundhe /
índrasya suṣuvāṇásya tredhā́_indriyáṃ vīryàṃ párāpatat /
bhṛ́gus tṛ́tīyam abhavat /
śrāyantī́yaṃ tṛ́tīyam /
sárasvatī tṛ́tīyam /
bhārgavó hótā bhavati /
śrāyantī́yaṃ brahmasāmáṃ bhavati /
vāravantī́yam agniṣṭomasāmám /
sārasvatī́r apó gṛhṇāti /
indriyásya vīryàsya_ávaruddhyai /
śrāyantī́yaṃ brahmasāmáṃ bhavati /
indriyám evā́smin vīryàm̐ śrayati /
vāravantī́yam agniṣṭomasāmám /
indriyám evā́smin vīryàṃ vārayati //

Commentaries (5)

Discussed in (4)