Taittiriyabrahmana 1.8.3
Taittirīyabrāhmaṇa 1.8.3
- Language
- Sanskrit
1.8.3.1
īśvaró vā́ eṣá díśó 'nū́nmaditoḥ /
yáṃ díśó 'nu vyāsthāpáyanti /
diśā́m áveṣṭayo bhavanti /
dikṣv èvá prátitiṣṭhaty ánunmādāya /
páñca devátā yajati /
páñca díśaḥ /
dikṣv èvá prátitiṣṭhati /
havíṣo_haviṣa iṣṭvā́ bārhaspatyám abhíghārayayati /
yajamānadevatyò vái bṛ́haspátiḥ /
yájamānam evá téjasā sámardhayati //
1.8.3.2
ādityā́ṃ malhā́ṃ garbhíṇīm ā́labhate /
mārutī́ṃ pṛ́śniṃ paṣṭhauhī́m /
víśaṃ caivā́smai rāṣṭráṃ ca samī́cī dadhāti /
ādityáyā pū́rvayā prácarati /
mārutyā_úttarayā /
rāṣṭrá evá víśam ánubadhnāti /
uccáir ādityā́yā ā́śrāvayati /
upām̐śú mārutyai /
tásmād rāṣṭráṃ víśam átivadati /
garbhíṇy ādityā́ bhavati //
1.8.3.3
indriyáṃ vái gárbhaḥ /
rāṣṭrám evá_indriyāvy àkaḥ /
agarbhā́ mārutī́ /
víḍ vái marútaḥ /
víśam evá nírindriyām akaḥ /
deva_asurā́ḥ sáṃyattā āsan /
té devā́ aśvínoḥ pūṣán vācáḥ satyám̐ saṃnidhā́ya /
ánṛtena_ásurān abhyàbhavan /
tè 'śvibhyā̀ṃ pūṣṇé puroḍā́śaṃ dvā́daśakapālaṃ níravapan /
táto vái té vācáḥ satyám ávārundhata //
1.8.3.4
yád aśvibhyāṃ pūṣṇé puroḍā́śaṃ dvā́daśakapālaṃ nírvapati /
ánṛtena_evá bhrā́tṛvyān abhibhū́ya /
vācáḥ satyám ávarundhe /
sárasvate satyavā́ce carúm /
pū́rvam evá_uditám /
úttareṇa_abhígṛṇāti /
savitré satyáprasavāya puroḍā́śaṃ dvā́daśakapālaṃ prásūtyai /
dūtā́n práhiṇoti /
āvída etā́ bhavanti /
āvídam eváinaṃ gamayanti /
átho dūtébhya evá ná cchidyate /
tisṛdhanvám̐ śuṣkadṛtír dákṣiṇā sámṛddhyai //
Commentaries (5)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Taittirīyabrāhmaṇaṭīkā — Sanskrit
- Yajurbrahmaṇabhāṣya — Sāyaṇācārya, Sanskrit
Discussed in (2)
- Vedic Index of Names and Subjects — Macdonell & Keith 1912, English
- The Religion and Philosophy of the Veda and Upanishads — Keith 1925, English