Pramāṇa · Search · About · API

Taittiriyabrahmana 1.8.5

Taittirīyabrāhmaṇa 1.8.5

Language
Sanskrit

1.8.5.1

índrasya suṣuvāṇásya daśadhā́_indriyáṃ vīryàṃ párāpatat /
sá yát prathamáṃ niráṣṭhīvat /
tát kvalam abhavat /
yád dvitī́yam /
tád bádaram /
yát tṛtī́yam /
tát karkándhu /
yán nastáḥ /
sá sim̐háḥ /
yád ákṣyoḥ //

1.8.5.2

sá śārdūláḥ /
yát kárṇayoḥ /
sá vṛ́kaḥ /
yá ūrdhváḥ /
sá sómaḥ /
yā́_avācī /
sā́ súrā /
trayā́ḥ sáktavo bhavanti /
indriyásya_ávaruddhyai /
trayā́ṇi lómāni //

1.8.5.3

tvíṣim evá_avarundhe /
tráyo gráhāḥ /
vīryàm evá_avarundhe /
nā́mnā daśamī́ /
náva vái púruṣe prāṇā́ḥ /
nā́bhir daśamī́ /
prāṇā́ indriyáṃ vīryàm /
prāṇā́n evá_indriyáṃ vīryàṃ yájamāna ātmán dhatte /
sī́sena klībā́t_śáṣpāṇi krīṇāti /
ná vā́ etád áyo ná híraṇyam //

1.8.5.4

yát sī́sam /
ná strī́ ná púmān /
yát klībáḥ /
ná sómo ná súrā /
yát sautrāmaṇī́ sámṛddhyai /
svādvī́ṃ tvā svādúnā_íty āha /
sómam eváināṃ karoti /
sómo 'sy aśvíbhyāṃ pacyasva sárasvatyai pacyasva_índrāya sutrā́mṇe pacyasva_íty āha /
etā́bhyo hy èṣā́ devátābhyaḥ pácyate /
tisráḥ sám̐sṛṣṭā vasati //

1.8.5.5

tisró hí rā́trīḥ krītáḥ sómo vásati /
punā́tu te parisrutam íti yájuṣā punāti vyā́vṛttyai /
pavítreṇa punāti /
pavítreṇa hí sómaṃ punánti /
vā́reṇa śáśvatā tánā_íty āha /
vā́reṇa hí sómaṃ punánti /
vāyúḥ pūtáḥ pavítreṇa_íti ná_etáyā punīyāt /
vyṛ̀ddhā hy èṣā́ /
atipavitásya_etáyā punīyāt /
kuvíd aṅga_íty ániruktayā prājāpatyáyā gṛhṇāti //

1.8.5.6

ániruktaḥ prajā́patiḥ /
prajā́pater ā́ptyai /
ékayā_ṛcā́ gṛhṇāti /
ekadhā́_evá yájamāne vīryàṃ dadhāti /
āśvináṃ dhūmrám ā́labhate /
aśvínau vái devā́nāṃ bhiṣájau /
tā́bhyām evā́smai bheṣajáṃ karoti /
sārasvatáṃ meṣám /
vā́g vái sárasvatī /
vācā́_éváinaṃ bhiṣajyati /
aindrám ṛṣabhám̐ sa_indratvā́ya //

Commentaries (5)

Linked texts (2)

Discussed in (3)