Taittiriyabrahmana 1.8.6
Taittirīyabrāhmaṇa 1.8.6
- Language
- Sanskrit
1.8.6.1
yát triṣú yū́peṣv ālábheta /
bahirdhā́_asmād indriyáṃ vīryàṃ dadhyāt /
bhrā́tṛvyam asmai janayet /
ekayūpá ā́labhate /
ekadhā́_evā́sminn indriyáṃ vīryàṃ dadhāti /
ná_asmai bhrā́tṛvyaṃ janayati /
ná_etéṣāṃ paśūnā́ṃ puroḍā́śā bhavanti /
gráhapuroḍāśā hy èté /
yuvám̐ surā́mam aśvinā_íti sarvadevatyè yājyānuvākyè bhavataḥ /
sárvā evá devátāḥ prīṇāti //
1.8.6.2
brāhmaṇáṃ párikrīṇīyād ucchéṣaṇasya pātā́ram /
brāhmaṇó hy ā́hutyā ucchéṣaṇasya pātā́ /
yádi brāhmaṇáṃ ná vindét /
valmīkavapā́yām ávanayet /
sā́_evá tátaḥ prā́yaścittiḥ /
yád vái sautrāmaṇyái vyṛddham /
tád asyai sámṛddham /
nānādevatyā̀ḥ paśávaś ca puroḍā́śāś ca bhavanti sámṛddhyai /
aindráḥ paśūnā́m uttamó bhavati /
aindráḥ puroḍā́śānāṃ prathamáḥ //
1.8.6.3
indriyé evā́smai samī́cī dadhāti /
purástād anūyājā́nāṃ puroḍā́śaiḥ prácarati /
paśávo vái puroḍā́śāḥ /
paśū́n evá_avarundhe /
aindrám ékādaśakapālaṃ nírvapati /
indriyám evá_avarundhe /
sāvitráṃ dvā́daśakapālaṃ prásūtyai /
vāruṇáṃ dáśakapālam /
antatá evá váruṇam ávayajate /
váḍabā dákṣiṇā //
1.8.6.4
utá vā́ eṣā́_áśvam̐ sūté /
utá_áśvatarám /
utá sóma utá súrā /
yát sautrāmaṇī́ sámṛddhyai /
bārhaspatyáṃ paśúṃ caturthámatipavitásya_ā́labhate /
bráhma vái devā́nāṃ bṛ́haspátiḥ /
bráhmaṇā_evá yajñásya vyṛ̀ddham ápivapati /
puroḍā́śavān eṣá paśúr bhavati /
ná hy étasya gráhaṃ gṛhṇánti /
sómapratīkāḥ pitaras tṛpṇuta_íti śata_ātṛṇṇā́yām̐ samávanayati //
1.8.6.5
śatá_āyuḥ púruṣaḥ śatá_indriyaḥ /
ā́yuṣy evá_indriyé prátitiṣṭhati /
dákṣiṇe 'ganú juhoti /
pāpavasyasásya vyā́vṛttyai /
híraṇyam antarā́ dhārayati /
pūtā́m eváināṃ juhoti /
śatámānaṃ bhavati /
śatá_āyuḥ púruṣaḥ śatá_indriyaḥ /
ā́yuṣy evá_indriyé prátitiṣṭhati /
yátra_evá śata_ātṛṇṇā́ṃ dhāráyati //
1.8.6.6
tán nídadhāti prátiṣṭhityai /
pitṛ́̄n vā́ etásya_indriyáṃ vīryàṃ gacchati /
yám̐ sómo 'tipavate /
pitṛṇā́ṃ yājyānuvākyā̀bhir úpa tiṣṭhate /
yád evā́sya pitṛ́̄n indriyáṃ vīryàṃ gácchati /
tád evá_avarundhe /
tisṛ́bhir úpatiṣṭhate /
tṛtī́ye vā́ itó loké pitáraḥ /
tā́n evá prīṇāti /
átho trī́ṇi vái yajñásya_indriyā́ṇi /
adhvaryúr hótā brahmā́ /
tá úpatiṣṭhante /
yā́ny evá yajñásya_indriyā́ṇi /
táir evā́smai bheṣajáṃ karoti //
Commentaries (5)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Taittirīyabrāhmaṇaṭīkā — Sanskrit
- Yajurbrahmaṇabhāṣya — Sāyaṇācārya, Sanskrit
Linked texts (1)
- Hiraṇyakeśiśrautasūtra — Hiraṇyakeśin, Sanskrit
Discussed in (1)
- History of Dharmaśāstra (Ancient and Mediaeval Religious and Civil Law in India) — Kane 1930, English