Taittiriyabrahmana 2.1.10
Taittirīyabrāhmaṇa 2.1.10
- Language
- Sanskrit
2.1.10.1
yád agním uddhárati /
vásavas tárhy agníḥ /
tásmin yásya táthāvidhe júhvati /
vásuṣv evā́sya_agnihotrám̐ hutáṃ bhavati //
níhito dhūpāyáñ_ śete /
rudrā́s tárhy agníḥ /
tásmin yásya táthāvidhe júhvati /
rudréṣv evá_asya_agnihotrám̐ hutáṃ bhavati //
prathamám idhmám arcir ā́labhate /
ādityā́s tárhy agníḥ //
2.1.10.2
tásmin yásya táthāvidhe júhvati /
ādityéṣv evā́sya_agnihotrám̐ hutáṃ bhavati //
sárva evá sarvaśá idhmá ā́dīpto bhavati /
víśve devā́s tárhy agníḥ /
tásmin yásya táthāvidhe júhvati /
víśveṣv evā́sya devéṣv agnihotrám̐ hutáṃ bhavati //
nitarā́m arcír upā́vaiti lohinī́kā_iva bhavati /
índras tárhy agníḥ /
tásmin yásya táthāvidhe júhvati /
índra evā́sya_agnihotrám̐ hutáṃ bhavati //
2.1.10.3
áṅgārā bhavanti /
tébhyó 'ṅgārebhyo 'rcír údeti /
prajā́patis tárhy agníḥ /
tásmin yásya táthāvidhe júhvati /
prajā́patāv evā́sya_agnihotrám̐ hutáṃ bhavati //
śáró 'ṅgārā ádhyūhante /
bráhma tárhy agníḥ /
tásmin yásya táthāvidhe júhvati /
bráhmann evā́sya_agnihotrám̐ hutáṃ bhavati //
vásuṣu rudréṣv ādityéṣu víśveṣu devéṣu /
índre prajā́patau bráhman /
áparivargam evā́sya_etā́su devátāsu hutáṃ bhavati /
yásya_eváṃ vidúṣo 'gnihotráṃ júhvati /
yá u ca_enad eváṃ véda //
Commentaries (5)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Yajurbrahmaṇabhāṣya — Sāyaṇācārya, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Taittirīyabrāhmaṇaṭīkā — Sanskrit
Linked texts (1)
- Śrautakośa — Sanskrit