Taittiriyabrahmana 2.1.3
Taittirīyabrāhmaṇa 2.1.3
- Language
- Sanskrit
2.1.3.1
rudró vā́ eṣáḥ /
yád agníḥ /
pátnī sthālī́ /
yán mádhye 'gnér adhiśráyet /
rudrā́ya pátnīm ápidadhyāt /
pramā́yukā syāt /
udīcó 'ṅgārān nirū́hya_ádhiśrayati /
pátniyai gopīthā́ya /
vyàntān karoti /
táthā pátny ápramāyukā bhavati //
2.1.3.2
gharmó vā́ eṣó 'śāntaḥ /
áhar_ahaḥ právṛjyate /
yád agnihotrám /
prátiṣiñcet paśúkāmasya /
śāntám iva hí paśavyàm //
ná prátiṣiñced brahmavarcasákāmasya /
sámiddham iva hí brahmavarcasám /
átho khálu /
pratiṣícyam evá /
yát pratiṣiñcáti //
2.1.3.3
tát paśavyàm /
yáj juhóti /
tád brahmavarcasí /
ubháyam evá_akaḥ //
prácyutaṃ vā́ etád asmā́l lokā́t /
ágataṃ devalokám /
yát_śṛtám̐ havír ánabhighāritam /
abhídyotayati /
abhy èváinad ghārayati /
átho devatrá_eváinad gamayati //
2.1.3.4
páryagni karoti /
rákṣasām ápahatyai /
tríḥ páryagni karoti /
tryā̀vṛd dhí yajñáḥ /
átho medhyatvā́ya //
yát prācī́nam udvāsáyet /
yájamānam̐ śucā́_arpayet /
yád dakṣiṇā́ /
pitṛdevatyàm̐ syāt /
yát pratyák //
2.1.3.5
pátnīm̐ śucā́_arpayet /
udīcī́nam údvāsayati /
eṣā́ vái devamanuṣyā́ṇām̐ śāntā́ dík /
tā́m eváinad ánū́dvāsayati śā́ntyai //
vártma karoti /
yajñásya sáṃtatyai //
níṣṭapati /
úpa_evá tát stṛṇāti //
catúr únnayati /
cátuṣpādaḥ paśávaḥ //
2.1.3.6
paśū́n evá_avarundhe /
sárvān pūrṇā́n únnayati /
sárve hí púṇyā rāddhā́ḥ /
anū́ca únnayati /
prajā́yā anūcīnatvā́ya /
anū́cy evā́sya prajā́_ardhukā bhavati //
sáṃmṛśati vyā́vṛttyai //
ná_áhoṣyann úpasādayet /
yád áhoṣyann upasādáyet /
yáthā_anyásmā upanidhā́ya //
2.1.3.7
anyásmai prayácchati /
tādṛ́g evá tát /
ā́_asmai vṛścyeta /
yád evá gā́rhapatye 'dhiśráyati /
téna gā́rhapatyaṃ prīṇāti //
agnír abibhet /
ā́hutayo mā_átyeṣyanti_íti /
sá etā́m̐ samídham apaśyat /
tā́m ā́dhatta /
táto vā́ agnā́v ā́hutayo 'dhriyanta //
2.1.3.8
yád enam̐ samáyacchat /
tát samídhaḥ samittvám /
samídham ā́dadhāti /
sám eváinaṃ yacchati /
ā́hutīnāṃ dhṛ́tyai /
átho agnihotrám evá_idhmávat karoti /
ā́hutīnāṃ prátiṣṭhityai //
brahmavādíno vadanti /
yád ékām̐ samídham ādhā́ya dvé ā́hutī juhóti /
átha kásyām̐ samídhi dvitī́yām ā́hutiṃ juhoti_íti //
2.1.3.9
yád dvé samídhāv ādadhyā́t /
bhrā́tṛvyam asmai janayet /
ékām̐ samídham ādhā́ya /
yájuṣā_anyā́m ā́hutiṃ juhoti /
ubhé evá samídvatī ā́hutī juhoti /
ná_asmai bhrā́tṛvyaṃ janayati //
ā́dīptāyāṃ juhoti /
sámiddham iva hí brahmavarcasám /
átho yáthā_átithiṃ jyótiṣ kṛtvā́ parivéveṣṭi /
tādṛ́g eva tát //
catúr únnayati /
dvír juhoti /
tásmād dvipā́d_cátuṣpādam atti /
átho dvipády evá cátuṣpadaḥ prátiṣṭhāpayati //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (1)
- Yajurbrāhmaṇa — Sanskrit