Taittiriyabrahmana 2.1.4
Taittirīyabrāhmaṇa 2.1.4
- Language
- Sanskrit
2.1.4.1
uttarā́vatīṃ vái devā́ ā́hutim ájuhavuḥ /
ávācīm ásurāḥ /
táto devā́ ábhavan /
párā_ásurāḥ /
yáṃ kāmáyeta vásīyān syād íti /
kánīyas tásya pū́rvam̐ hutvā́ /
úttaraṃ bhū́yo juhuyāt /
eṣā́ vā́ uttarā́vaty ā́hutiḥ /
tā́ṃ devā́ ajuhavuḥ /
tátastè 'bhavan //
2.1.4.2
yásya_eváṃ júhvati /
bhávaty evá //
yáṃ kāmáyeta pā́pīyānt syād íti /
bhū́yas tásya pū́rvam̐ hutvā́ /
úttaraṃ kánīyo juhuyāt /
eṣā́ vā́ ávācy ā́hutiḥ /
tā́m ásurā ajuhavuḥ /
tátas té párābhavan /
yásya_eváṃ júhvati /
párā_evá bhavati //
2.1.4.3
hutvā́_upasādayaty ájāmitvāya /
átho vyā́vṛttyai //
gā́rhapatyaṃ prátīkṣate /
ánanudhyāyinam eváinaṃ karoti //
agnihotrásya vái sthāṇúr asti /
táṃ yá ṛcchét /
yajñasthāṇúm ṛcchet /
eṣá vā́ agnihotrásya sthāṇúḥ /
yát pū́rvā_ā́hutiḥ /
tā́ṃ yád úttarayā_abhíjuhuyā́t //
2.1.4.4
yajñasthāṇúm ṛcchet /
atihā́ya pū́rvām ā́hutiṃ juhoti /
yajñasthāṇúm evá párivṛṇakti /
átho bhrā́tṛvyam evá_āptvā́_atikrāmati //
avācī́nam̐ sāyám úpamārṣṭi /
réta evá tád dadhāti /
ūrdhváṃ prātáḥ /
prá janayaty evá tát //
brahmavādíno vadanti /
catúr únnayati //
2.1.4.5
dvír juhoti /
átha kvà dvé ā́hutī bhavata íti /
agnáu vaiśvānará íti brūyāt /
eṣá vā́ agnír vaiśvānaráḥ /
yád brāhmaṇáḥ /
hutvā́ dvíḥ prā́śnāti /
agnā́v evá vaiśvānaré dvé ā́hutī juhoti /
dvír juhóti /
dvír nímārṣṭi /
dvíḥ prā́śnāti //
2.1.4.6
ṣáṭ sáṃpadyante /
ṣáḍ vā́ ṛtávaḥ /
ṛtū́n evá prīṇāti //
brahvamādíno vadanti /
kiṃdevatyàm agnihotrám íti /
vaiśvadevám íti brūyāt /
yád yájuṣā juhóti /
tád aindrāgnám /
yát tūṣṇī́m /
tát prājāpatyám //
2.1.4.7
yán nimā́rṣṭi /
tád óṣadhīnām /
yád dvitī́yam /
tát pitṛṇā́m /
yát prā́śnāti /
tád gárbhāṇām /
tásmād gárbhā ánaśnanto vardhante /
yád ācā́mati /
tán manuṣyā̀ṇām //
údaṅ paryāvṛ́tya_ā́cāmati //
2.1.4.8
ātmáno gopīthā́ya //
nírṇenekti śúddhyai /
níṣṭapati svagā́kṛtyai /
úddiśati /
saptaṛṣī́n evá prīṇāti //
dakṣiṇā́ paryā́vartate /
svám evá vīryàm ánu paryā́vartate /
tásmād dákṣiṇó 'rdha ātmáno vīryā̀vattaraḥ /
átho ādityásyaivá_āvṛ́tam ánu paryā́vartate //
hutvā́_upasámindhe //
2.1.4.9
brahmavarcasásya sámiddhyai //
ná barhír ánu práharet /
ásam̐sthito vā́ eṣá yajñáḥ /
yád agnihotrám /
yád anupraháret /
yajñáṃ vícchindyāt /
tásmān ná_anuprahṛ́tyam /
yajñásya sáṃtatyai //
apó nínayati /
avabhṛthásyaivá rūpám akaḥ //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (3)
- Yajurbrāhmaṇa — Sanskrit
- Altindische Grammatik — Jacob Wackernagel & Albert Debrunner, German
- Śrautakośa — Sanskrit