Pramāṇa · Search · About · API

Taittiriyabrahmana 2.1.5

Taittirīyabrāhmaṇa 2.1.5

Language
Sanskrit

2.1.5.1

brahmavādíno vadanti /
agnihotráprāyaṇā yajñā́ḥ /
kíṃprāyaṇam agnihotrám íti /
vatsó vā́ agnihotrásya prā́yaṇam /
agnihotráṃ yajñā́nām /
tásya pṛthivī́ sádaḥ /
antárikṣam ā́gnīdhram /
dyáur havirdhā́nam /
divyā́ ā́paḥ prókṣaṇayaḥ /
óṣadhayo barhíḥ //

2.1.5.2

vánaspátaya idhmáḥ /
díśaḥ paridháyaḥ /
ādityó yū́paḥ /
yájamānaḥ paśúḥ /
samudrò 'vabhṛtháh /
saṃvatsaráḥ svagākāráḥ /
tásmād ā́hitāgneḥ sárvam evá barhiṣyàṃ dattáṃ bhavati /
yát sāyáṃ juhóti /
rā́trim evá téna dakṣiṇyā̀ṃ kurute /
yát prātáḥ //

2.1.5.3

áhar evá téna dakṣiṇyàṃ kurute /
yát táto dádāti /
sā́ dákṣiṇā //
yā́vanto vái devā́ áhutam ā́dan /
té párābhavan /
tá etád agnihotrám̐ sárvasyaivá samavadā́ya_ajuhavuḥ /
tásmād āhuḥ /
agnihotráṃ vái dvā́ gṛhā́ṇāṃ níṣkṛtim apaśyann íti /
yát sāyáṃ juhóti /
rā́triyā evá tád dhutā́dyāya //

2.1.5.4

yájamānasya_áparābhāvāya /
yát prātáḥ /
áhna evá tád dhutā́dyāya /
yájamānasya_áparābhāvāya /
yát táto 'śnā́ti /
hutám evá tát //
dváyoḥ páyasā juhuyāt paśúkāmasya /
etád vā́ agnihotráṃ mithunám /
yá eváṃ véda /
prá prajáyā paśúbhir mithunáir jāyate //

2.1.5.5

imā́m evá pū́rvayā duhé /
amū́m úttarayā /
adhiśrítya_úttaram ā́nayati /
yónāv evá tád rétaḥ siñcati prajánane //
ā́jyena juhuyāt téjaskāmasya /
téjo vā́ ā́jyam /
tejasvy èvá bhavati /
páyasā paśúkāmasya /
etád vái paśūnā́m̐ rūpám /
rūpéna_evā́smai paśū́n ávarundhe //

2.1.5.6

paśumā́n evá bhavati /
dadhnā́_indriyákāmasya /
indriyáṃ vái dádhi /
indriyāvy èvá bhavati /
yavāgvā̀ grā́makāmasya_oṣadhā́ vái manuṣyā̀ḥ /
bhāgadhéyenaivā́smai sajātā́n ávarundhe /
grāmy èvá bhavati //
áyajño vā́ eṣáḥ /
yò 'sāmā́ //

2.1.5.7

catúr únnayati /
cáturakṣaram̐ rathaṃtarám /
rathantarásyaiṣá várṇaḥ /
upári_iva harati /
antárikṣaṃ vāmadevyám /
vāmadevyásyaiṣá várṇaḥ /
dvír juhoti /
dvyàkṣaraṃ bṛhát /
bṛhatá eṣá várṇaḥ /
agnihotrám evá tát sā́manvat karoti //

2.1.5.8

yó vā́ agnihotrásya_upasádo véda /
úpa_enam upasádo namanti /
vindáta upasattā́ram /
unnī́ya_úpasādayati /
pṛthivī́m evá prīṇāti /
hoṣyánn úpasādayati /
antárikṣam evá prīṇāti /
hutvā́_upasādayati /
dívam evá prīṇāti /
etā́ vā́ agnihotrásya_upasádaḥ //

2.1.5.9

yá eváṃ véda /
úpa_enam upasádo namanti /
vindáta upasattā́ram //
yó vā́ agnihotrásya_ā́śrāvitaṃ pratyā́śrā́vitam̐ hótāraṃ brahmā́ṇaṃ vaṣaṭkāráṃ véda /
tásya tv èvá hutám /
prāṇó vā́ agnihotrásya_ā́śrāvitam /
apānáḥ pratyā́śrāvitam /
máno hótā /
cákṣur brahmā́ /
nimeṣó vaṣaṭkāráḥ //

2.1.5.10

yá eváṃ véda /
tásya tv èvá hutám //
sāyaṃyā́vānaś ca vái devā́ḥ prātaryā́vāṇaś ca_agnihotríṇo gṛhám ā́gacchanti /
tā́n yán ná tarpáyet /
prajáyā_asya paśúbhir vítiṣṭheran /
yát tarpáyet /
tṛptā́ enaṃ prajáyā paśúbhis tarpayeyuḥ //
sajū́r deváiḥ sāyáṃ yā́vabhir íti sāyám̐ sáṃmṛśati /
sajū́r deváiḥ prātár yā́vabhir íti prātáḥ /
yé caivá devā́ḥ sāyaṃyā́vāno yé ca prātaryā́vāṇaḥ //

2.1.5.11

tā́n evá_ubháyām̐s tarpayati /
tá enaṃ tṛptā́ḥ prajáyā paśúbhis tarpayanti //
aruṇó ha sma_āha_áupaveśiḥ /
agnihotrá evá_ahám̐ sāyáṃ_prātar vájraṃ bhrā́tṛvyebhyaḥ práharāmi /
tásmān mát pā́pīyām̐so bhrā́tṛvyā íti /
catúr únnayati /
dvír juhoti /
samít saptamī́ /
saptápadā śákvarī /
śākvaró vájraḥ /
agnihotrá evá tát sāyáṃ_prātar vájraṃ yájamāno bhrā́tṛvyāya práharati /
bhávaty ātmánā /
párā_asya bhrā́tṛvyo bhavati //

Commentaries (4)

Linked texts (8)