Pramāṇa · Search · About · API

Taittiriyabrahmana 2.1.6

Taittirīyabrāhmaṇa 2.1.6

Language
Sanskrit

2.1.6.1

prajā́patir akāmayata_ātmanván me jāyeta_íti /
sò 'juhot /
tásya_ātmanvád ajāyata /
agnír vāyúr ādityáḥ /
tè 'bruvan /
prajā́patir ahauṣīd ātmanván me jāyeta_íti /
tásya vayám ajaniṣmahi /
jā́yatāṃ na ātmanvád íti tè 'juhavuḥ /
prāṇā́nām agníḥ /
tanúvai vāyúḥ //

2.1.6.2

cákṣuṣa ādityáḥ /
téṣām̐ hutā́d ajāyata gáur evá //
tásyai páyasi vyā́yacchanta /
máma hutā́d ajani máma_íti /
té prajā́patiṃ praśnám āyan /
sá ādityò 'gním abravīt /
yataró nau jáyāt /
tán nau sahá_asad íti /
kásya_ékó 'hauṣīd íti prajā́patir abravīt kásya_éka íti /
prāṇā́nām ahám íty agníḥ //

2.1.6.3

tanúvā ahám íti vāyúḥ /
cákṣuṣo 'hám íty ādityáḥ /
yá evá prāṇā́nām áhauṣīt /
tásya hutā́d ajani_íti /
agnér hutā́d ajani_íti /
tád agnihotrásya_agnihotratvám /
gáur vā́ āgnihotrám /
yá eváṃ véda gáur agnihotrám íti /
prāṇāpānā́bhyām evá_agním̐ sámardhayati /
ávyardhukaḥ prāṇāpānā́bhyāṃ bhavati //

2.1.6.4

yá eváṃ véda //
táu vāyúr abravīt /
ánu mā_ā́bhajatam íti /
yád evá gā́rhapatye 'dhiśrítya_āhavanī́yam abhyùddrávān /
téna tvā́ṃ prīṇān íty abrūtām /
tásmād yád gā́rhapatye 'dhiśrítya_āhavanī́yam abhyùddravati /
vāyúm evá téna prīṇāti //
prajā́patir devátāḥ sṛjámānaḥ /
agním evá devátānāṃ prathamám asṛjata /
sò 'nyád ālambhyàm ávittvā //

2.1.6.5

prajā́patim abhí paryā́vartata /
sá mṛtyór abibhet /
sò 'múm ādityám ātmáno níramimīta /
tám̐ hutvā́ párāṅ paryā́vartata /
táto vái sá mṛtyúm ápājayat /
ápa mṛtyúṃ jayati /
yá eváṃ véda //
tásmād yásya_eváṃ vidúṣaḥ /
uta_éka_ahám utá dvyaháṃ ná júhvati /
hutám evā́sya bhavati /
asáu hy ādityò 'gnihotrám //

Commentaries (4)

Linked texts (3)