Taittiriyabrahmana 2.1.9
Taittirīyabrāhmaṇa 2.1.9
- Language
- Sanskrit
2.1.9.1
tráyo vái praiyamedhā́ āsan /
téṣāṃ trír éko 'gnihotrám ajuhot /
dvír ékaḥ /
sakṛ́d ékaḥ /
téṣāṃ yás trír ajuhot /
sá ṛcā́_ajuhot /
yó dvíḥ /
sá yájuṣā /
yáḥ sakṛ́t /
sá tūṣṇī́m //
2.1.9.2
yáś ca yájuṣā́_ajuhod yáś ca tūṣṇī́m /
tā́v ubhā́v ārdhnutām /
tásmād yájuṣā_ā́hutiḥ pū́rvā hotavyā̀ /
tūṣṇī́m úttarā /
ubhé evá_ṛddhī́ ávarundhe //
agnír jyótir jyótir agníḥ svā́hā_íti sāyáṃ juhoti /
réta evá tád dadhāti /
sū́ryo jyótir jyótiḥ sū́ryaḥ svā́hā_íti prātáḥ /
réta evá hitáṃ prájanayati //
réto vā́ etásya hitáṃ ná prájāyate //
2.1.9.3
yásya_agnihotrám áhutam̐ sū́ryo 'bhy ùdéti /
yády ánte syā́t /
unnī́ya prā́ṅ udā́dravet /
sá upasā́dya_ā́támitor āsīta /
sá yadā́tā́myet /
átha bhū́ḥ svā́hā_íti juhuyāt /
prajā́patir vái bhūtáḥ /
tám evá_upāsarat /
sá eváinaṃ táta únnayati /
ná_ā́rtim ā́rcchati yájamānaḥ //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (2)
- A Vedic Concordance — Maurice Bloomfield, English
- Yajurbrāhmaṇa — Sanskrit