Pramāṇa · Search · About · API

Taittiriyabrahmana 2.2.10

Taittirīyabrāhmaṇa 2.2.10

Language
Sanskrit

2.2.10.1

prajā́patir índram asṛjata_ānujāvaráṃ devā́nām /
táṃ prā́hiṇot /
párehi /
etéṣāṃ devā́nām ádhipatir edhi_íti /
táṃ devā́ abruvan /
kás tvám ási /
vayáṃ vái tvát_śréyām̐saḥ sma íti /
sò 'bravīt /
kás tvám ási vayáṃ vái tvát_śréyām̐saḥ sma íti mā devā́ avocann íti //
átha vā́ idáṃ tárhi prajā́patau hára āsīt //

2.2.10.2

yád asmínn ādityé /
tád enam abravīt /
etán me práyaccha /
átha_ahám etéṣāṃ devā́nām ádhipatir bhaviṣyāmi_íti /
kò 'ham̐ syām íty abravīt /
etát pradā́ya_íti /
etát syā íty abravīt /
yád etád brávīṣi_íti /
kó ha vái nā́ma prajā́patiḥ /
yá eváṃ véda //

2.2.10.3

vidúr enaṃ nā́mnā /
tád asmai rukmáṃ kṛtvā́ prátyamuñcat /
táto vā́ índro devā́nām ádhipatir abhavat /
yá eváṃ véda /
ádhipatir evá samānā́nāṃ bhavati //
sò 'manyata /
kíṃ_kiṃ vā́ akaram íti /
sá candráṃ ma ā́hara_íti prā́lapat /
tác candrámasaś candramastvám /
yá eváṃ véda //

2.2.10.4

candrávān evá bhavati //
táṃ devā́ abruvan /
suvī́ryo maryā yáthā gopāyáta íti /
tát sū́ryasya sūryatvám /
yá eváṃ véda /
náinaṃ dabhnoti //
káś ca ná_asmin vā́ idám indriyáṃ prátyasthād íti /
tád índrasya_indratvám /
yá eváṃ véda /
indriyāvy èvá bhavati //

2.2.10.5

ayáṃ vā́ idáṃ paramò 'bhūd íti /
tát parameṣṭhínaḥ parameṣṭhitvám /
yá eváṃ véda /
paramā́m evá kā́ṣṭhāṃ gacchati //
táṃ devā́ḥ samantáṃ páryaviśan /
vásavaḥ purástāt /
rudrā́ dakṣiṇatáḥ /
ādityā́ḥ paścā́t /
víśve devā́ uttaratáḥ /
áṅgirasaḥ pratyáñcam //

2.2.10.6

sādhyā́ḥ párāñcam /
yá eváṃ véda /
úpa_enam̐ samānā́ḥ sáṃviśanti //
sá prajā́patir evá bhūtvā́ prajā́ ā́vayat /
tā́ asmai ná_atiṣṭhanta_annā́dyāya /
tā́ múkhaṃ purástāt páśyantīḥ /
dakṣiṇatáḥ páryāyan /
sá dakṣiṇatáḥ páryavartayata /
tā́ múkhaṃ purástāt páśyantīḥ /
múkhaṃ dakṣiṇatáḥ //

2.2.10.7

paścā́t páryāyan /
sá paścā́t páryavartayata /
tā́ múkhaṃ purástāt páśyantīḥ /
múkhaṃ dakṣiṇatáḥ /
múkhaṃ paścā́t /
uttaratáḥ páryāyan /
sā́ uttaratáḥ páryavartayata /
tā́ múkhaṃ purástāt páśyantīḥ /
múkhaṃ dakṣiṇatáḥ /
múkhaṃ paścā́t //
múkham uttaratáḥ /
ūrdhvā́ údāyan /
sá upáriṣṭān nyàvartayata /
tā́ḥ sarvátomukho bhūtvā́_ā́vayat /
táto vái tásmai prajā́ átiṣṭhanta_annā́dyāya /
yá eváṃ vidvā́n pári ca vartáyate ní ca /
prajā́patir evá bhutvā́ prajā́ atti /
tíṣṭhante 'smai prajā́ annā́dyāya /
annādá evá bhavati //

Commentaries (4)

Linked texts (4)