Taittiriyabrahmana 2.2.11
Taittirīyabrāhmaṇa 2.2.11
- Language
- Sanskrit
2.2.11.1
prajā́patir akāmayata bahór bhū́yānt syām íti /
sá etáṃ dáśahotāram apaśyat /
táṃ prā́yuṅkta /
tásya práyukti bahór bhū́yān abhavat /
yáḥ kāmáyeta bahór bhū́yānt syām íti /
sá dáśahotāraṃ práyuñjīta /
bahór evá bhū́yān bhavati //
sò 'kāmayata vīró ma ā́jāyeta_íti /
sá dáśahotuś cáturhotāraṃ níramimīta /
táṃ prā́yuṅkta //
2.2.11.2
tásya práyukti_índro 'jāyata /
yáḥ kāmáyeta vīró ma ā́jāyeta_íti /
sá cáturhotāraṃ práyuñjīta /
ā́_asya vīró jāyate //
sò 'kāmayata paśumā́nt syām íti /
sá cáturhotuḥ páñcahotāraṃ níramimīta /
táṃ prā́yuṅkta /
tásya práyukti paśumā́n abhavat /
yáḥ kāmáyeta paśumā́nt syām íti /
sá páñcahotāraṃ práyuñjīta //
2.2.11.3
paśumā́n evá bhavati /
sò 'kāmayata_ṛtávo me kalperann íti /
sá páñcahotuḥ ṣáḍḍhotāraṃ níramimīta /
táṃ prā́yuṅkta /
tásya práyukty ṛtávo 'smā akalpanta /
yáḥ kāmáyeta_ṛtávo me kalperann íti /
sá ṣáḍḍhotāraṃ práyuñjīta /
kálpante 'smā ṛtávaḥ //
sò 'kāmayata somapáḥ somayājī́ syām /
ā́ me somapáḥ somayājī́ jāyeta_íti //
2.2.11.4
sá ṣáḍḍhotuḥ saptáhotāraṃ níramimīta /
táṃ prā́yuṅkta /
tásya práyukti somapáḥ somayājy àbhavat /
ā́_asya somapáḥ somayājy àjāyata /
yáḥ kāmáyeta somapáḥ somayājī́ syām /
ā́ me somapáḥ somayājī́ jāyeta_íti /
sá saptáhotāraṃ práyuñjīta /
somapá evá somayājī́ bhavati /
ā́_asya somapáḥ somayājī́ jāyate //
sá vā́ eṣá paśúḥ pañcadhā́ pratitiṣṭhati //
2.2.11.5
padbhír múkhena //
té devā́ḥ paśū́n vittvā́ /
suvargáṃ lokám āyan /
tè 'múṣmin_loké vyakṣudhyan /
tè 'bruvan /
amútaḥ pradānaṃ vā́ úpajijīvima_íti /
té saptáhotāraṃ yajñáṃ vidhā́ya_ayā́syam /
āṅgīrasáṃ prā́hiṇvan /
eténa_amútra kalpaya_íti /
tásya ā́ iyáṃ kŀ̥ptiḥ //
2.2.11.6
yád idáṃ kíñ ca /
yá eváṃ véda kálpate 'smai /
sá vā́ ayáṃ manuṣyèṣu yajñáḥ saptáhotā /
amútra sadbhyó devébhyo havyáṃ vahati /
yá eváṃ véda /
úpa_enaṃ yajñó namati //
yó vái cáturhotṛṇāṃ nidā́naṃ véda /
nidā́navān bhavati /
agnihotráṃ vái dáśahotur nidā́nam /
darśapūrṇamāsáu cáturhotuḥ /
cāturmāsyā́ni páñcahotuḥ /
paśubandháḥ ṣáḍḍhotuḥ /
saumyò 'dhvaráḥ saptáhotuḥ /
etád vái cáturhotṛṇāṃ nidā́nam /
yá eváṃ véda /
nidā́navān bhavati //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (2)
- Yajurbrāhmaṇa — Sanskrit
- Altindische Grammatik — Jacob Wackernagel & Albert Debrunner, German