<!-- Pramāṇa, a library of Indian primary sources · https://indike.org/pramana/in.veda.brahmana.taittiriya.2.2.2 -->

[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 2.2.2

# Taittiriyabrahmana 2.2.2

Taittirīyabrāhmaṇa 2.2.2

- **Language:** Sanskrit

### [2.2.2.1](https://indike.org/pramana/in.veda.brahmana.taittiriya.2.2.2.1)

prajā́patir akāmayata darśapūrṇamāsáu sṛjeya\_íti /  
sá etáṃ cáturhotāram apaśyat /  
táṃ mánasā\_anudrútya\_āhavanī́ye 'juhot /  
táto vái sá darśapūrṇamāsā́v asṛjata /  
tā́v asmāt sṛṣṭā́v ápākrāmatām /  
táu gráheṇa\_agṛhṇāt /  
tád gráhasya grahatvám /  
darśapūrṇamāsā́v ālábhamānaḥ /  
cáturhotāraṃ mánasā\_anudrútya\_āhavanī́ye juhuyāt /  
darśapūrṇamāsā́v evá sṛṣṭvā́\_ārábhya prátanute //

### [2.2.2.2](https://indike.org/pramana/in.veda.brahmana.taittiriya.2.2.2.2)

gráho bhavati /  
darśapūrṇamāsáyoḥ sṛṣṭáyor dhṛ́tyai //  
sò 'kāmayata cāturmāsyā́ni sṛjeya\_íti /  
sá etáṃ páñcahotāram apaśyat /  
táṃ mánasā\_anudrútya\_āhavanī́ye 'juhot /  
táto vái sá cāturmāsyā́ny asṛjata /  
tā́ny asmāt sṛṣṭā́ny ápākrāman /  
tā́ni gráheṇa\_agṛhṇāt /  
tád gráhasya grahatvám /  
cāturmāsyā́ny ālábhamānaḥ //

### [2.2.2.3](https://indike.org/pramana/in.veda.brahmana.taittiriya.2.2.2.3)

páñcahotāraṃ mánasā\_anudrútya\_āhavanī́ye juhuyāt /  
cāturmāsyā́ny evá sṛṣṭvā́\_ārábhya prátanute /  
gráho bhavati /  
cāturmāsyā́nām̐ sṛṣṭā́nāṃ dhṛ́tyai //  
sò 'kāmayata paśubandhám̐ sṛjeya\_iti /  
sá etám̐ ṣáḍḍhotāram apaśyat /  
táṃ mánsā\_anudrútya\_āhavanī́ye 'juhot /  
táto vái sá paśubandhám asṛjata /  
sò 'smā́t sṛṣṭó 'pākrāmat /  
táṃ gráheṇa\_agṛhṇāt //

### [2.2.2.4](https://indike.org/pramana/in.veda.brahmana.taittiriya.2.2.2.4)

tád gráhasya grahatvám /  
paśubandhéna yakṣyámāṇaḥ /  
ṣáḍḍhotāraṃ mánasā\_anudrútya\_āhavanī́ye juhuyāt /  
paśubandhám evá sṛṣṭvā́\_ārábhya prátanute /  
gráho bhavati /  
paśubandhásya sṛṣṭásya dhṛ́tyai //  
sò 'kāmayata saumyám adhvarám̐ sṛjeya\_íti /  
sá etám̐ saptáhotāram apaśyat /  
táṃ mánasā\_anudrútya\_āhavanī́ye 'juhot /  
táto vái sá saumyám adhvarám asṛjata //

### [2.2.2.5](https://indike.org/pramana/in.veda.brahmana.taittiriya.2.2.2.5)

sò 'smā́t sṛṣṭó 'pākrāmat /  
táṃ gráheṇa\_agṛhṇāt /  
tád gráhasya grahatvám /  
dīkṣiṣyámāṇaḥ /  
saptáhotāraṃ mánasā\_anudrútya\_āhavanī́ye juhuyāt /  
saumyám evá\_adhvarám̐ sṛṣṭvā́\_ārábhya prátanute /  
gráho bhavati /  
saumyásya\_adhvarásya sṛṣṭásya dhṛ́tyai //  
devébhyo vái yajñó na prā́bhavat /  
tám etā́vat\_śas sámabharan //

### [2.2.2.6](https://indike.org/pramana/in.veda.brahmana.taittiriya.2.2.2.6)

yát saṃbhārā́ḥ /  
táto vái tébhyo yajñáḥ prā́bhavat /  
yát saṃbhārā́ bhavani /  
yajñásya prábhūtyai /  
ātithyám āsā́dya vyā́caṣṭe /  
yajñamukháṃ vā́ ātithyáṃ /  
mukhatá evá yajñám̐ saṃbhṛ́tya prátanute //  
áyajño vā́ eṣáḥ /  
yò 'patnī́kaḥ /  
ná prajā́ḥ prájāyeran /  
pátnīr vyā́caṣṭe /  
yajñám evá\_akaḥ /  
prajā́nāṃ prajánanāya //  
upasátsu vyā́caṣṭe /  
etád vái pátnīnām āyátanam /  
svá eváinā āyátané 'vakalpayati //

## Commentaries (5)

- [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.60.8.13) — Sāyaṇa, Sanskrit
- [Yajurbrahmaṇabhāṣya](https://indike.org/pramana/in.veda.brahmana.taittiriya!sayanacarya.60.6.13) — Sāyaṇācārya, Sanskrit
- [Jñānayajña on the Taittirīya Brāhmaṇa (Bhaṭṭabhāskara)](https://indike.org/pramana/in.veda.brahmana.taittiriya!bhattabhaskara.38.1) — Bhaṭṭabhāskara Miśra, Sanskrit
- [Taittirīyabrāhmaṇakāṭhakabhāṣya](https://indike.org/pramana/in.veda.brahmana.taittiriya!bhatta-bhaskara-misra-cikaedamandana) — Bhaṭṭa Bhāskara Miśra Cikāeḍamaṇḍana, Sanskrit
- [Taittirīyabrāhmaṇaṭīkā](https://indike.org/pramana/in.veda.brahmana.taittiriya!taittiriyabrahmanatika) — Sanskrit

## Discussed in (5)

- [Vedic Index of Names and Subjects](https://indike.org/pramana/ins.reference.macdonell-keith-1912.v1.c3.s14.113) — Macdonell & Keith 1912, English
- [The Religion and Philosophy of the Veda and Upanishads](https://indike.org/pramana/ins.religion.keith-1925.v1.c20.s3.12) — Keith 1925, English
- [Saṃnyāsa Upaniṣads: Hindu Scriptures on Asceticism and Renunciation](https://indike.org/pramana/ins.religion.olivelle-1992.c5.s2.t1.14) — Olivelle 1992, English
- [The Position of Women in Hindu Civilisation, from Prehistoric Times to the Present Day](https://indike.org/pramana/ins.polity.altekar-1938.c7.s1.8) — Altekar 1938, English
- [Vedic Mythology](https://indike.org/pramana/ins.religion.macdonell-1897.c5.s4.14) — Macdonell 1897, English

---
Source: [https://indike.org/pramana/in.veda.brahmana.taittiriya.2.2.2](https://indike.org/pramana/in.veda.brahmana.taittiriya.2.2.2) · Pramāṇa
