Pramāṇa · Search · About · API

Taittiriyabrahmana 2.2.5

Taittirīyabrāhmaṇa 2.2.5

Language
Sanskrit

2.2.5.1

devā́ vái váruṇam ayājayan /
sá yásyai_yasyai devátāyai dákṣiṇām ánayat /
tā́m avlīnāt /
tè 'bruvan /
vyāvṛ́tya práti gṛhṇāma /
táthā no dákṣiṇā ná vleṣyati_íti /
té vyāvṛ́tya prátyagṛhṇan /
táto vái tā́n dákṣiṇā ná_avlīnāt /
yá eváṃ vidvā́n vyāvṛ́tya dákṣiṇāṃ pratigṛhṇā́ti /
ná_enaṃ dákṣiṇā vlīnāti //

2.2.5.2

rā́jā tvā váruṇo nayatu devi dakṣiṇè 'gnáye híraṇyam íty āha /
āgneyáṃ vái híraṇyam /
sváyā_eváinad devátayā prátigṛhṇāti /
sómāya vā́sa íty āha /
saumyáṃ vái vā́saḥ /
sváyā_eváinad devátayā prátigṛhṇāti /
rudrā́ya gā́m íty āha /
raudrī́ vái gáuḥ /
sváyā_eváinā́ṃ devátayā prátigṛhṇāti /
váruṇāya_áśvam íty āha //

2.2.5.3

vāruṇó vā́ áśvaḥ /
sváyā_eváinaṃ devátayā prátigṛhṇāti /
prājā́pataye púruṣam íty āha /
prājāpatyó vái púruṣaḥ /
sváyā_eváinaṃ devátayā prátigṛhṇāti /
mánave tálpam íty āha /
mānavó vái tálpaḥ /
sváyā_eváinaṃ devátayā prátigṛhṇāti /
uttānā́yā_āṅgīrasa_áyā́na íty āha /
iyáṃ vā́ uttāná āṅgīrasáḥ //

2.2.5.4

anáyā_eváinat prátigṛhṇāti //
vaiśvānaryā́_ṛcā́ ráthaṃ prátigṛhṇāti /
vaiśvānaró vái devátayā ráthaḥ /
sváyā_eváinaṃ devátayā prátigṛhṇāti //
téna_amṛtatvám aśyām íty āha /
amṛ́tam evá_ātmán dhatte //
váyo dātrá íty āha /
váya eváinaṃ kṛtvā́ /
suvargáṃ lokáṃ gamayati /
máyo máhyam astu pratigrahītrá íty āha //

2.2.5.5

yád vái śivám /
tán máyaḥ /
ātmána eváiṣā́ párīttiḥ //
ká idáṃ kásmā adād íty āha /
prajā́patir vái káḥ /
sá prajā́pataye dadāti //
kā́maḥ kā́māya_íty āha /
kā́mena hí dádāti /
kā́mena pratigṛhṇā́ti //
kā́mo dātā́ kā́maḥ pratigrahītā́_íty āha //

2.2.5.6

kā́mo hí dātā́ /
kā́maḥ pratigrahītā́ //
kā́mam̐ samudrámā́viśa_íty āha /
samudrá iva hí kā́maḥ /
ná_iva hí kā́masya_ántò 'sti /
ná samudrásya //
kā́mena tvā prátigṛhṇāmi_íty āha /
yéna kā́mena pratigṛhṇā́ti /
sá eváinam amúṣmin_loké kā́ma ā́gacchati //
kā́ma_etát ta eṣā́ te kā́ma dákṣiṇā_íty āha /
kā́ma evá tád yájamāno 'múṣmin_loké dákṣiṇām icchti /
ná pratigrahītári //
yá eváṃ vidvā́n dákṣiṇāṃ pratigṛhṇā́ti /
anṛṇā́m eváināṃ prátigṛhṇāti //

Commentaries (4)

Linked texts (7)