Taittiriyabrahmana 2.2.6
Taittirīyabrāhmaṇa 2.2.6
- Language
- Sanskrit
2.2.6.1
ánto vā́ eṣá yajñásya /
yád daśamám áhaḥ /
daśamé 'han sarparājñíyā ṛgbhíḥ stuvanti /
yajñásya_evá_ántaṃ gatvā́ /
annā́dyam ávarundhate //
tisṛ́bhiḥ stuvanti /
tráya imé lokā́ḥ /
ebhyá evá lokébhyo 'nnā́dyam ávarundhate /
pṛ́śnivatīr bhavanti /
ánnaṃ vái pṛ́śni //
2.2.6.2
ánnam evá_avarundhate //
mánasā prástauti /
mánasā_údgāyati /
mánasā prátiharati /
mána iva hí prajā́patiḥ /
prajā́pater ā́ptyai //
devā́ vái sarpā́ḥ /
téṣām iyám̐ rā́jñī /
yát sarparājñíyā ṛgbhíḥ stuvánti /
asyā́m evá prátitiṣṭhanti //
2.2.6.3
cáturhotṝn hótā vyā́caṣṭe /
stutám ánuśam̐sati śā́ntyai //
ánto vā́ eṣá yajñásya /
yád daśamám áhaḥ /
etát khálu vái devā́nāṃ páramaṃ gúhyaṃ bráhma /
yác cáturhotāraḥ /
daśamé 'ham̐ś cáturhotṝn vyā́caṣṭe /
yajñásya_evá_ántaṃ gatvā́ /
paramáṃ devā́nāṃ gúhyaṃ bráhma_ávarundhe /
tád evá prakāśáṃ gamayati //
2.2.6.4
tád enaṃ prakāśáṃ gatám /
prakāśáṃ prajā́nāṃ gamayati //
vā́caṃ yacchati /
yájñásya dhṛ́tyai //
yajamānadevatyàṃ vā́ áhaḥ /
bhrātṛvyadevatyā̀ rā́triḥ /
áhnā rā́triṃ dhyāyet /
bhrā́tṛvyasya_evá tál lokáṃ vṛṅkte /
yád dívā vā́caṃ visṛjét /
áhar bhrā́tṛvyāya_úcchim̐ṣet /
yán náktaṃ visṛjét /
rā́triṃ bhrā́tṛvyāya_úcchim̐ṣet /
adhivṛkṣasūryé vā́caṃ vísṛjati /
etā́vantam evā́smai lokám úcchim̐ṣati /
yā́vad ādityò 'staméti //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (2)
- Yajurbrāhmaṇa — Sanskrit
- A Vedic Concordance — Maurice Bloomfield, English