Pramāṇa · Search · About · API

Taittiriyabrahmana 2.2.7

Taittirīyabrāhmaṇa 2.2.7

Language
Sanskrit

2.2.7.1

prajā́patiḥ prajā́ asṛjata /
tā́ḥ sṛṣṭā́ḥ sámaśliṣyan /
tā́ rūpéṇa_ánuprā́viśat /
tásmād āhuḥ /
rūpáṃ vái prajā́patir íti /
tā́ nā́mnā_ánuprā́viśat /
tásmād āhuḥ /
nā́ma vái prajā́patir íti /
tásmād ápy āmitráu saṃgátya /
nā́mnā céd dhváyete //

2.2.7.2

mitrám evá bhavataḥ //
prajā́patir deva_asurā́n asṛjata /
sá índram ápi ná_asṛjata /
táṃ devā́ abruvan /
índraṃ no janaya_íti /
sá ātmánn índram apaśyat /
tám asṛjata /
táṃ triṣṭúg vīryàṃ bhūtvā́_anuprā́viśat /
tásya vájraḥ pañcadaśó hásta ā́padyata /
téna_udáyya_ásurān abhyàbhavat //

2.2.7.3

yá eváṃ véda /
abhí bhrā́tṛvyān bhavati //
té devā́ ásurair vijítya /
suvargáṃ lokám āyan /
tè 'múṣmin_loké vyakṣudhyan /
tè 'bruvan /
amútaḥ pradānaṃ vā́ úpajijīvima_íti /
té saptáhotāraṃ yajñáṃ vidhā́ya_ayā́syam /
āṅgīrasáṃ prā́hiṇvan /
eténa_amútra kalpaya_íti //

2.2.7.4

tásya vā́ iyáṃ kŀ̥ptiḥ /
yád idáṃ kíṃ ca /
yá eváṃ véda /
kálpate 'smai /
sá vā́ ayáṃ manuṣyèṣu yajñáḥ saptáhotā /
amútra sadbhyó devébhyo havyáṃ vahati /
yá eváṃ véda /
úpa_enaṃ yajñó namati //
sò 'manyata /
abhí vā́ imè 'smāl lokā́d amúṃ lokáṃ kamiṣyanta íti /
sá vā́caspate hṛ́d íti vyā́harat /
tásmāt puttró hṛ́dayam /
tásmād asmā́l lokā́d amúṃ lokáṃ ná_abhíkāmayante /
putró hí hṛ́dayam //

Commentaries (4)

Linked texts (7)