Taittiriyabrahmana 2.2.8
Taittirīyabrāhmaṇa 2.2.8
- Language
- Sanskrit
2.2.8.1
devā́ vái cáturhotṛbhir yajñám atanvata /
té ví pāpmánā bhrā́tṛvyeṇa_ájayanta /
abhí suvargáṃ lokám ajayan /
yá eváṃ vidvā́m̐ś cáturhotṛbhir yajñáṃ tanuté /
ví pāpmánā bhrā́tṛvyeṇa jayate /
abhí suvargáṃ lokáṃ jayati //
ṣáḍḍhotrā prāyaṇī́yam ā́sādayati /
amúṣmai vái lokā́ya ṣáḍḍhotā /
ghnánti khálu vā́ etát sómam /
yád abhiṣuṇvánti //
2.2.8.2
ṛjudhā_éváinam amúṃ lokáṃ gamayati /
cáturhotrā_ātithyám /
yáśo vái cáturhotā /
yáśa evá_ātmán dhatte /
páñcahotrā paśúm úpasādayati /
suvargyò vái páñcahotā /
yájamānaḥ paśúḥ /
yájamānam evá suvargáṃ lokáṃ gamayati /
gráhān gṛhītvā́ saptáhotāraṃ juhoti /
indriyáṃ vái saptáhotā //
2.2.8.3
indriyám evá_ātmán dhatte //
yó vái cáturhotṝn anusavanáṃ tarpáyati /
tṛ́pyati prajáyā paśúbhiḥ /
úpa_enam̐ somapīthó namati /
bahiṣpavamāné dáśahotāraṃ vyā́cakṣīta /
mā́dhyandine pávamāne cáturhotāram /
ā́rbhave pávamāne páñcahotāram /
pitṛyajñé ṣáḍḍhotāram /
yajñāyajñíyasya stotré saptáhotāram /
anusavanám eváinām̐s tarpayati //
2.2.8.4
tṛ́pyati prajáyā paśúbhiḥ /
úpa_enam̐ somapīthó namati //
devā́ vái cáturhotṛbhiḥ sattrám āsata /
ṛ́ddhiparimitaṃ yáśaskāmāḥ /
tè 'bruvan /
yán naḥ prathamáṃ yáśa ṛcchā́t /
sárveṣāṃ nas tát sahá_asad íti /
sómaś cáturhotrā /
agníḥ páñcahotrā /
dhātā́ ṣáḍḍhotrā //
2.2.8.5
índraḥ saptáhotrā /
prajā́patir dáśahotrā /
téṣām̐ sómam̐ rā́jānaṃ yáśa ārccat //
tán nyakāmayata /
téna_ápākrāmat /
téna pralā́yam acarat /
táṃ devā́ḥ praiṣáiḥ práiṣam aicchan /
tát praiṣā́ṇāṃ praiṣatvám /
nivídbhir nyàvedayan /
tán nivídāṃ nivittvám //
2.2.8.6
āprī́bhir āpnuvan /tád āprī́ṇām āpritvám /
tám aghnan /
tásya yáśo vyàgṛhṇata /
té gráhā abhavan /
tád gráhāṇāṃ grahatvám /
yásya_eváṃ vidúṣo gráhā gṛhyánte /
tásya tv èva gṛhītā́ḥ //
tè 'bruvan /
yó vái naḥ śréṣṭhó 'bhūt //
2.2.8.7
tám avadhiṣma /
púnar imám̐ suvāmahā íti /
táṃ chándobhir asuvanta /
tác chándasāṃ chandastvám /
sā́mnā sámā́nayan /
tát sā́mnaḥ sāmatvám /
uktháir údasthāpayan /
tád ukthā́nām ukthatvám /
yá eváṃ véda /
práty evá tiṣṭhati //
2.2.8.8
sárvam ā́yur eti //
sómo vái yáśaḥ /
yá eváṃ vidvā́nt sómam āgácchati /
yáśa eváinam ṛcchati /
tásmād āhuḥ /
yáś ca_eváṃ véda yáś ca ná /
tā́v ubháu sómam ā́gacchataḥ /
sómo hí yáśaḥ /
táṃ tvā́ vá yáśa ṛcchati_íty āhuḥ /
yáḥ sóme sómaṃ prā́ha_íti /
tásmāt sóme sómaḥ prócyaḥ /
yáśa eváinam ṛcchati //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (1)
- Yajurbrāhmaṇa — Sanskrit