Pramāṇa · Search · About · API

Taittiriyabrahmana 2.2.9

Taittirīyabrāhmaṇa 2.2.9

Language
Sanskrit

2.2.9.1

idáṃ vā́ ágre ná_evá kíṃ caná_āsīt /
ná dyáur āsīt /
ná pṛthivī́ /
ná_antárikṣam /
tád ásad evá sán máno 'kuruta syā́m íti /
tád atapyata /
tásmāt tepānā́d dhūmò 'jāyata /
tád bhū́yo 'tapyata /
tásmāt tepānā́d agnír ajāyata /
tád bhū́yo 'tapyata //

2.2.9.2

tásmāt tepānā́j jyótir ajāyata /
tád bhū́yo 'tapyata /
tásmāt tepānā́d arcír ajāyata /
tád bhū́yo 'tapyata /
tásmāt tepānā́n márīcayo 'jāyanta /
tád bhū́yo 'tapyata /
tásmāt tepānā́d udārā́ ajāyanta /
tád bhū́yo 'tapyata /
tád abbhrám iva sámahanyata //
tád vastím abhinat //

2.2.9.3

sá samudrò 'bhavat /
tásmāt samudrásya ná pibanti /
prajánanam iva hí mányante /
tásmāt paśór jā́yamānād ā́paḥ purást ādyanti //
tád dáśahotā_anvasṛjyata /
prajā́patir vái dáśahotā /
yá eváṃ tápaso vīryàṃ vidvā́m̐s tápyate /
bhávaty evá //
tád vā́ idám ā́pas salilám āsīt /
sò 'rodīt prajā́patiḥ //

2.2.9.4

sá kásmā ajñi /
yády asyā́ ápratiṣṭhāyā íti /
yád apsv àvā́padyata /
sā́ pṛthivy àbhavat /
yád vyámṛṣṭa /
tád antárikṣam abhavat /
yád ūrdhvám udámṛṣṭa /
sā́ dyáur abhavat /
yád árodīt /
tád anáyo rodastvám //

2.2.9.5

yá eváṃ véda /
ná_asya gṛhé rudanti /
etád vā́ eṣā́ṃ lokā́nāṃ jánma /
yá evám eṣā́ṃ lokā́nāṃ jánma véda /
ná_eṣú lokéṣv ā́rtim ā́rcchati /
sá imā́ṃ pratiṣṭhā́m avindata //
sá imā́ṃ pratiṣṭhā́ṃ vittvā́_akāmayata prájāyeya_íti /
sá tápo 'tapyata /
sò 'ntárvān abhavat /
sá jaghánād ásurān asṛjata //

2.2.9.6

tébhyo mṛnmáye pā́tré 'nnam aduhat /
yā́_asya sā́ tanū́r ā́sīt /
tā́m ápāhata /
sā́ támisrā_abhavat //
sò 'kāmayata prájāyeya_íti /
sá tápo 'tapyata /
sò 'ntárvān abhavat /
sá prajánanād evá prajā́ asṛjata /
tásmād imā́ bhū́yiṣṭhāḥ /
prajánanād dhy ènā ásṛjata //

2.2.9.7

tā́bhyo dārumáye pā́tre páyo 'duhata /
yā́_asya sā́ tanū́r ā́sīt /
tā́m ápāhata sā́ jótsnā_abhavat //
sò 'kāmayata prájāyeya_íti /
sá tápo 'tapyata /
sò 'ntárvān abhavat /
sá upapakṣā́bhyām evá_ṛtū́n asṛjata /
tébhyo rajaté pā́tre ghṛtám aduhat /
yā́_asya sā́ tanū́r ā́sīt //

2.2.9.8

tám ápāhata /
sò 'horātráyoḥ sandhír abhavat //
sò 'kāmayata prájāyeya_íti /
sá tápo 'tapyata /
sò 'natárvān abhavat /
sá múkhād devā́n asṛjata /
tébhyo hárite pā́tre sómam aduhata /
yā́_asya sā́ tanū́r ā́sīt /
tā́m ápāhata /
tád áhar abhavat //

2.2.9.9

eté vái prajā́pater dóhāḥ /
yá eváṃ véda /
duhá evá prajā́ḥ //
dívā vái no 'bhūd íti /
tád devā́nāṃ devatvám /
yá eváṃ devā́nāṃ devatváṃ véda /
devávān evá bhvati //
etád vā́ ahorātrā́ṇāṃ jánma /
yá evám ahorātrā́ṇāṃ jánma véda /
ná_ahorātréṣv ā́rtim ā́rcchati //

2.2.9.10

ásató 'dhi máno 'sṛjyata /
mánaḥ prajā́patim asṛjata /
prajā́patiḥ prajā́ asṛjata /
tád vā́ idáṃ mánasy evá paramáṃ prátiṣṭhitam /
yád idáṃ kíṃ ca /
tád etát_śvòvasyasáṃ nā́ma bráhma //
vyucchántī vyucchanty asmai vásyasī vasyasī vyucchati /
prájāyate prajáyā paśúbhiḥ /
prá parameṣṭhíno mā́trām āpnoti /
yá eváṃ véda //

Commentaries (4)

Linked texts (9)