Pramāṇa · Search · About · API

Taittiriyabrahmana 2.3.10

Taittirīyabrāhmaṇa 2.3.10

Language
Sanskrit

2.3.10.1

prajā́patiḥ sómam̐ rā́jānam asṛjata /
táṃ tráyo védā ánvasṛjyanta /
tā́n háste 'kuruta /
átha há sī́tā sāvitrī́ /
sómam̐ rā́jānaṃ cakame /
śraddhā́m u sá cakame /
sā́ ha pitáraṃ prajā́patim úpasasāra /
tám̐ ha_uvāca /
námas te astu bhagavaḥ /
úpa tvā_ayāni //

2.3.10.2

prá tvā padye /
sómaṃ vái rā́jānaṃ kāmaye /
śraddhā́m u sá kāmayata íti /
tásyā u há sthāgarám alaṅkāráṃ kalpayitvā́ /
dáśahotāraṃ purástād vyākhyā́ya /
cáturhotāraṃ dakṣiṇatáḥ /
páñcahotāraṃ paścā́t /
ṣáḍḍhotāram uttaratáḥ /
saptáhotāram upáriṣṭāt /
sambhāráiś ca pátnibhiś ca múkhe 'laṅkṛ́tya //

2.3.10.3

ā́_asya_árdháṃ vavrāja /
tā́m̐ ha_udī́kṣya_uvāca /
úpa mā́ vartasva_íti /
táṃ ha_uvāca /
bhógaṃ tú ma ā́cakṣva /
etán ma ā́cakṣva /
yát te pāṇā́v íti /
tásyā u há trī́n védān prádadau /
tásmād ú ha stríyo bhógam ā́_evá hārayante //
sá yáḥ kāmáyeta priyáḥ syām íti //

2.3.10.4

yáṃ vā kāmáyeta priyáḥ syād íti /
tásmā etám̐ sthāgarám alaṅkāráṃ kalpayitvā́ /
dáśahotāraṃ purástād vyākhyā́ya /
cáturhotāraṃ dakṣiṇatáḥ /
pañcahotāraṃ paścā́t /
ṣáḍḍhotāram uttaratáḥ /
saptáhotāram upáriṣṭāt /
sambhāráiś ca pátnibhiś ca múkhe 'laṅkṛ́tya /
ā́_asya_árdhaṃ vrajet /
priyó ha_evá bhavati //

Commentaries (4)

Linked texts (6)