Taittiriyabrahmana 2.3.11
Taittirīyabrāhmaṇa 2.3.11
- Language
- Sanskrit
2.3.11.1
bráhmā_ātmanvád asṛjata /
tád akāmayata /
sám ātmánā pádyeya_íti /
ā́tmann ā́tmann íty ā́mantrayata /
tásmai daśamám̐ hūtáḥ prátyaśṛṇot /
sá dáśahūto 'bhavat /
dáśahūto ha vái nā́ma_eṣáḥ /
táṃ vā́ etáṃ dáśahūtam̐ sántam /
dáśahotā_íty ā́cakṣate parókṣeṇa /
parókṣapriyā iva hí devā́ḥ //
2.3.11.2
ā́tmann ā́tmann íty ā́mantrayata /
tásmai saptamám̐ hūtáḥ prátyaśṛṇot /
sá saptáhūto 'bhavat /
saptáhūto ha vái nā́ma_eṣáḥ /
táṃ vā́ etám̐ saptáhūtam̐ sántam /
saptáhotā_íty ā́cakṣate parókṣeṇa /
parókṣapriyā iva hí devā́ḥ //
ā́tmann ā́tmann íty ā́mantrayata /
tásmai ṣaṣṭhám̐ hūtáḥ prátyaśṛṇot /
sá ṣáḍḍhūto 'bhavat //
2.3.11.3
ṣáḍdhūto ha vái nā́ma_eṣáḥ /
táṃ vā́ etám̐ ṣáḍḍhūtam̐ sántam /
ṣáḍḍhotā_íty ā́cakṣate parókṣeṇa /
parókṣapriyā iva hí devā́ḥ //
ā́tmann ā́tmann íty ā́mantrayata /
tásmai pañcamám̐ hūtáḥ prátyaśṛṇot /
sá páñcahūto 'bhavat /
páñcahūto ha vái nā́ma_eṣáḥ /
táṃ vā́ etáṃ páñcahūtam̐ sántaṃ /
páñcahotā_íty ā́cakṣate parókṣeṇa //
2.3.11.4
parókṣapriyā iva hí devā́ḥ //
ā́tmann ā́tmann íty āmantrayata /
tásmai caturthám̐ hūtáḥ prátyaśṛṇot /
sá cáturhūto 'bhavat /
cáturhūto ha vái nā́ma_eṣáḥ /
táṃ vā́ etáṃ cáturhūtam̐ sántam /
cáturhotā_íty ā́cakṣate parókṣeṇa /
parókṣapriyā iva hí devā́ḥ //
tám abravīt /
tváṃ vái me nédiṣṭham̐ hūtáḥ prátyaśrauṣīḥ /
tváyā_enān ākhyātā́ra íti /
tásmān nú ha_enām̐ś cáturhotāra íty ā́cakṣate /
tásmāc śuśrūṣúḥ putrā́ṇām̐ hṛ́dyatamaḥ /
nédiṣṭho hṛ́dyatamaḥ /
nédiṣṭho bráhmaṇo bhavati /
yá eváṃ véda //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (1)
- Yajurbrāhmaṇa — Sanskrit