Pramāṇa · Search · About · API

Taittiriyabrahmana 2.3.2

Taittirīyabrāhmaṇa 2.3.2

Language
Sanskrit

2.3.2.1

dákṣiṇāṃ pratigrahīṣyánt saptádaśa kṛ́tvó 'pānyāt /
ātmā́nam evá sámindhe /
téjase vīryā̀ya /
átho prajā́patir eváināṃ bhūtvā́ prátigṛhṇāti /
ātmánó 'nārtyai //
yády enam ā́rtvijyād vṛtám̐ sántaṃ nirháreran /
ā́gnīdhre juhuyād dáśahotāram /
caturgṛhīténa_ā́jyena /
purástāt pratyáṅ tíṣṭhan /
pratilomáṃ vigrā́ham //

2.3.2.2

prāṇā́n evā́sya_úpadāsayati //
yád enaṃ púnar upaśíkṣeyuḥ /
ā́gnīdhra evá juhuyād dáśahotāram /
caturgṛhīténa_ā́jyena /
paścā́t prā́ṅ ā́sīnaḥ /
anulomám ávigrāham /
prāṇā́n evā́smai kalpayati //
prā́yaścittī vā́gg_hótā_íty ṛtumukhá ṛtumukhe juhoti /
ṛtū́n evā́smai kalpayati /
kálpante 'smā ṛtávaḥ //

2.3.2.3

kḷptā́ asmā ṛtáva ā́yanti //
ṣáḍḍhotā vái bhūtvā́ prajā́patir idám̐ sárvam asṛjata /
sá máno 'sṛjata /
mánasó 'dhi gāyatrī́m asṛjata /
tád gāyatrī́ṃ yáśa ārcchat /
tā́m ā́labhata /
gāyatriyā́ ádhi chándām̐sy asṛjata /
chándobhyó 'dhi sā́ma /
tát sā́ma yáśa ārcchat /
tád ā́labhata //

2.3.2.4

sā́mnó 'dhi yájūm̐ṣy asṛjata /
yájurbyó 'dhi víṣṇum /
tád víṣṇuṃ yáśa ārcchat /
tám ā́labhata /
víṣṇor ádhy óṣadhīr asṛjata /
óṣadhībhyó 'dhi sómam /
tát sómaṃ yáśa ārcchat /
tám ā́labhata /
sómād ádhi paśū́n asṛjata /
paśúbhyó 'dhi_índram //

2.3.2.5

tád índraṃ yáśa ārcchat /
tád enaṃ ná_atiprā́cyavata /
índra iva yaśasvī́ bhavati /
yá eváṃ véda ná_enaṃ yáśó 'tiprácyavate //
yád vā́ idáṃ kíṃ ca /
tát sárvam uttāna evá_āṅgīrasáḥ prátyagṛhṇāt /
tád enaṃ prátigṛhītaṃ ná_ahinat /
yát kíṃ ca pratigṛhṇīyā́t /
tát sárvam uttānás tv āṅgīrasáḥ prátigṛhṇātv íty evá prátigṛhṇīyāt /
iyáṃ vā́ uttāná āṅgīrasáḥ /
anáyā_eváinat prátigṛhṇāti /
ná_enam̐ hinasti //
barhíṣā prátīyād gā́ṃ vā_áśvaṃ vā /
etád vái paśūnā́ṃ priyáṃ dhā́ma /
priyéṇa_eváinaṃ dhā́mnā prátyeti //

Commentaries (4)

Linked texts (4)