Taittiriyabrahmana 2.3.4
Taittirīyabrāhmaṇa 2.3.4
- Language
- Sanskrit
2.3.4.1
tásya vā́ agnér híraṇyaṃ pratijagrahúṣaḥ /
ardhám indriyásya_ápākrāmat /
tád eténaivá prátyagṛhṇāt /
téna vái sò 'rdhám indriyásya_ātmánn upā́dhatta /
ardhám indriyásya_ātmánn upā́dhatte /
yá eváṃ vidvā́n híraṇyaṃ pratigṛhṇā́ti /
átha yò 'vidvān pratigṛhṇā́ti /
ardhám asya_indriyásya_ápakrāmati //
tásya vái sómasya vā́saḥ pratijagrahúṣaḥ /
tṛ́tīyam indriyásya_ápākrāmat //
2.3.4.2
tád eténaivá prátyagṛhṇāt /
téna vái sá tṛ́tīyam indriyásya_ātmánn upā́dhatta /
tṛ́tīyam indriyásya_ātmánn upā́dhatte /
yá eváṃ vidvān vā́saḥ pratigṛhṇā́ti /
átha yó 'vidvān pratigṛhṇā́ti /
tṛ́tīyam asya_indriyásya_ápakrāmati /
tásya vái rudrásya gā́ṃ pratijagrahúṣaḥ /
caturthám indriyásya_ápākrāmat /
tā́m eténaivá prátyagṛhṇāt /
téna vái sá caturthám indriyásya_ātmánn upā́dhatta //
2.3.4.3
caturthám indriyásya_ātmánn upā́dhatte /
yá eváṃ vidvā́n gā́ṃ pratigṛhṇā́ti /
átha yó 'vidvān pratigṛhṇā́ti /
caturthám asya_indriyásya_ápakrāmati /
tásya vái váruṇasya_áśvaṃ pratijagrahúṣaḥ /
pañcamám indriyásya_ápākrāmat /
tám eténaivá prátyagṛhṇāt /
téna vái sá pañcamám indriyásya_ātmánn upā́dhatta /
pañcamám indriyásya_ātmánn upā́dhatte /
yá eváṃ vidvā́n áśvaṃ pratigṛhṇā́ti //
2.3.4.4
átha yó 'vidvān pratigṛhṇā́ti /
pañcamám asya_indriyásya_ápakrāmati /
tásya vái prajā́pateḥ púruṣaṃ pratijagrahúṣaḥ /
ṣaṣṭhám indriyásya_ápākrāmat /
tám eténaivá prátyagṛhṇāt /
téna vái sá ṣaṣṭhám indriyásya_ātmánn upā́dhatta /
ṣaṣṭhám indriyásya_ātmánn upā́dhatte /
yá eváṃ vidvā́n púruṣaṃ pratigṛhṇā́ti /
átha yó 'vidvān pratigṛhṇā́ti /
ṣaṣṭhám asya_indriyásya_ápakrāmati //
2.3.4.5
tásya vái mános tálpaṃ pratijagrahúṣaḥ /
saptamám indriyásya_ápākrāmat /
tám eténaivá prátyagṛhṇāt /
téna vái sá saptamám indriyásya_ātmánn upā́dhatta /
saptamám indriyásya_ātmánn upā́dhatte /
yá eváṃ vidvā́m̐s tálpaṃ pratigṛhṇā́ti /
átha yó 'vidvān pratigṛhṇā́ti /
saptamám asya_indriyásya_ápakrāmati /
tásya vā́ uttānásya_āṅgīrasásya_áprāṇat pratijagrahúṣaḥ /
aṣṭamám indriyásya_ápākrāmat //
2.3.4.6
tád eténaivá prátyagṛhṇāt /
téna vái sò 'ṣṭamám indriyásya_ātmánn upā́dhatta /
aṣṭamám indriyásya_ātmánn upā́dhatte /
yá eváṃ vidvā́n áprāṇat pratigṛhṇā́ti /
átha yò 'vidvān pratigṛhṇā́ti /
aṣṭamám asya_indriyásya_ápakrāmati //
yád vā́ idáṃ kíṃ ca /
tát sárvam uttāná evá_āṅgīrasáḥ prátyagṛhṇāt /
tád enaṃ prátigṛhītaṃ ná_ahinat /
yát kíṃ ca pratigṛhṇīyā́t /
tát sárvam uttānás tv āṅgīrasáḥ prátigṛhṇātv íty evá prátigṛhṇīyāt /
iyáṃ vā́ uttāná āṅgīrasáḥ /
anáyā_eváinat prátigṛhṇāti /
ná_enam̐ hinasti //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (2)
- Yajurbrāhmaṇa — Sanskrit
- Altindische Grammatik — Jacob Wackernagel & Albert Debrunner, German