Pramāṇa · Search · About · API

Taittiriyabrahmana 2.3.5

Taittirīyabrāhmaṇa 2.3.5

Language
Sanskrit

2.3.5.1

brahmavādíno vadanti /
yád dáśahotāraḥ sattrám ā́sata /
kéna té gṛhápatinā_ārdhnuvan /
kéna prajā́ asṛjanta_íti /
prajā́patinā vái té gṛhápatinā_ārdhnuvan /
téna prajā́ asṛjanta //
yác cáturhotāraḥ sattrám ā́sata /
kéna té gṛhápatinā_ārdhnuvan /
kéna_óṣadhīr asṛjanta_íti /
sómena vái té gṛhápatinā_ārdhnuvan //

2.3.5.2

téna_óṣadhīr asṛjanta //
yát páñcahotāraḥ sattrám ā́sata /
kéna té gṛhápatinā_ārdhnuvan /
kéna_ebhyó lokébhyó 'surān prā́ṇudanta /
kéna_eṣāṃ paśū́n avṛñjata_íti /
agnínā vái té gṛhápatinā_ārdhnuvan /
téna_ebhyó lokébhyó 'surān prā́ṇudanta /
téna_eṣāṃ paśū́n avṛñjata //
yát ṣaḍḍhotāraḥ sattrám ā́sata /
kéna té gṛhápatinā_ārdhnuvan //

2.3.5.3

kéna_ṛtū́n akalpayanta_íti /
dhātrā́ vái té gṛhápatinā_ārdhnuvan /
téna_ṛtū́n akalpayanta //
yát saptáhotāraḥ sattram ā́sata /
kéna té gṛhápatinā_ārdhnuvan /
kéna súvar āyan /
kéna_imā́n_lokā́nt sámatanvann íti /
aryamṇā́ vái té gṛhápatinā_ārdhnuvan /
téna súvar āyan /
téna_imā́n_lokā́n sámatanvann íti //

2.3.5.4

eté vái devā́ gṛhápatayaḥ /
tā́n yá eváṃ vidvā́n /
ápy anyásya gārhapaté dī́kṣate /
avāntarám evá sattríṇām ṛdhnoti //
yó vā́ aryamáṇaṃ véda /
dā́nakāmā asmai prajā́ bhavanti /
yajñó vā́ aryamā́ /
ā́ryā vasatír íti vái tám āhur yáṃ praśám̐santi /
ā́ryā vasatír bhavati /
yá eváṃ véda //

2.3.5.5

yád vā́ idáṃ kíṃ ca /
tát sárvaṃ cáturhotāraḥ /
cáturhotṛbhyó 'dhi yajñó nírmitaḥ /
sá yá eváṃ vidvā́n vivádeta /
ahám evá bhū́yo veda /
yáś cáturhotṝn véda_íti /
sá hy èvá bhū́yo véda /
yáś cáturhotṝn véda //
yó vái cáturhotṛṇām̐ hótṝn véda /
sárvāsu prajā́sv ánnam atti //

2.3.5.6

sárvā díśo 'bhíjayati /
prajā́patir vái dáśahotṛṇām̐ hótā /
sómaś cáturhotṛṇām̐ hótā /
agníḥ páñcahotṛṇām̐ hótā /
dhātā́ ṣáḍḍhotṛṇām̐ hótā /
aryamā́ saptáhotṛṇām̐ hótā /
eté vái cáturhotṛṇām̐ hótāraḥ /
tā́n yá eváṃ véda /
sárvāsu prajā́sv ánnam atti /
sárvā díśo 'bhijayati //

Commentaries (4)

Linked texts (3)