Pramāṇa · Search · About · API

Taittiriyabrahmana 2.3.6

Taittirīyabrāhmaṇa 2.3.6

Language
Sanskrit

2.3.6.1

prajā́patiḥ prajā́ḥ sṛṣṭvā́ vyasram̐sata /
sá hṛ́dayaṃbhūtò 'śayat /
ā́tman hā́3 íty áhvayat /
ā́paḥ prátyaśṛṇvan /
tā́ agnihotréṇa_evá yajñakratúnā_úpaparyā́vartanta /
tā́ḥ kúsindham úpauhan /
tásmād agnihotrásya yajñakratóḥ /
éka ṛtvík //
catuṣkṛ́tvó 'hvayat /
agnír vāyúr ādityáś candrámāḥ //

2.3.6.2

té prátyaśṛṇvan /
té darśapūrṇamāsā́bhyām evá yajñakratúnā_úpaparyā́vartanta /
tá úpauham̐ś catvā́ry áṅgāni /
tásmād darśapūrṇamāsáyor yajñakratóḥ /
catvā́ra ṛtvíjaḥ //
pañcakṛ́tvó 'hvayat /
paśávaḥ prátyaśṛṇvan /
té cāturmāsyáir evá yajñakratúnā_úpaparyā́vartanta /
tá úpauhan_lóma cchavī́ṃ mām̐sám ásthi majjā́nam /
tásmāc cāturmāsyā́nāṃ yajñakratóḥ //

2.3.6.3

páñca_ṛtvíjaḥ //
ṣaṭkṛ́tvó 'hvayat /
ṛtávaḥ prátyaśṛṇvan /
té paśubandhéna_evá yajñakratúnā_úpaparyā́vartanta /
tá úpauhaṃ stánāv āṇḍáu śiśnám ávāñcaṃ prāṇám /
tásmāt paśubandhásya yajñakratóḥ /
ṣáḍ ṛtvíjaḥ //
saptakṛ́tvó 'hvayat /
hótrāḥ prátyaśṛṇvan /
tā́ḥ saumyéna_evá_adhvaréṇa yajñakratúnā_úpaparyā́vartanta //

2.3.6.4

tā́ úpauhant saptá śīrṣaṇyā̀n prāṇā́n /
tásmāt saumyásya_adhvarásya yajñakratóḥ /
saptá hótrāḥ prā́cīr váṣaṭkurvanti //
daśakṛ́tvó 'hvayat /
tápaḥ prátyaśṛṇot /
tát kármaṇā_evá saṃvatsaréṇa sárvair yajñakratúbhir úpaparyā́vartata /
tát sárvam ātmā́nam áparivargam úpauhat /
tásmāt saṃvatsaré sárve yajñakratávó 'varudhyante //
tásmād dáśahotā cáturhotā /
páñcahotā ṣáḍḍhotā saptáhotā /
ékahotre balím̐ haranti háranty asmai prajā́ balím /
ā́_enam ápratikhyātaṃ gacchati /
yá eváṃ véda //

Commentaries (4)

Linked texts (4)