Taittiriyabrahmana 2.3.7
Taittirīyabrāhmaṇa 2.3.7
- Language
- Sanskrit
2.3.7.1
prajā́patiḥ púruṣam asṛjata /
sò 'gnír abravīt /
mama_ayám ánnam astv íti /
sò 'bibhet /
sárvaṃ vái mā_ayáṃ prádhakṣyati_íti /
sá etā́m̐ś cáturhotṝn ātmaspáraṇān apaśyat /
tā́n ajuhot /
táir vái sá ātmā́nam aspṛṇot //
yád agnihotráṃ juhóti /
ékahotāram evá tád yajñakratúm āpnoty agnihotrám //
2.3.7.2
kúsindhaṃ ca_ātmánaḥ spṛṇóti /
ādityásya ca sā́yujyaṃ gacchati //
catúr únnayati /
cáturhotāram evá tád yajñakratúm āpnoti
darśapūrṇamāsáu /
catvā́ri ca_ātmánó 'ṅgāni spṛṇóti /
ādityásya ca sā́yujyaṃ gacchati //
catúr únnayati /
samít pañcamī́ /
páñcahotāram evá tád yajñakratúm āpnoti /
cāturmāsyā́ni /
lóma cchavī́ṃ mām̐sám ásthi majjā́nam //
2.3.7.3
tā́ni ca_ātmánaḥ spṛṇóti /
ādityásya ca sā́yujyaṃ gacchati //
catúr únnayati /
dvír juhoti /
ṣáḍḍhotāram evá tád yajñakratúm āpnoti
paśubandhám /
stánāv āṇḍáu śiśnám ávāñcaṃ prāṇám /
tā́ni ca_ātmánaḥ spṛṇóti /
ādityásya ca sā́yujyaṃ gacchati //
catúr únnayati /
dvír juhoti //
2.3.7.4
samít saptamī́ /
saptáhotāram evá tád yajñakratúm āpnoti saumyám adhvarám /
saptá ca_ātmánaḥ śīrṣaṇyā̀n prāṇā́n spṛṇóti /
ādityásya ca sā́yujyaṃ gacchati //
catúr únnayati /
dvír juhóti /
dvír nímārṣṭi /
dvíḥ prā́śnāti /
dáśahotāram evá tád yajñakratúm āpnoti saṃvatsarám /
sárvaṃ ca_ātmā́nam áparivargam̐ spṛṇóti /
ādityásya ca sā́yujyaṃ gacchati //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (1)
- Yajurbrāhmaṇa — Sanskrit