Taittiriyabrahmana 2.3.8
Taittirīyabrāhmaṇa 2.3.8
- Language
- Sanskrit
2.3.8.1
prajā́patir akāmayata prájāyeya_íti /
sá tápo 'tapyata /
sò 'ntárvān abhavat /
sá háritaḥ śyāvò 'bhavat /
tásmāt stry àntárvatnī /
hariṇī satī́ śyāvā́ bhavati /
sá vijā́yamāno gárbheṇa_atāmyat /
sá tāntáḥ kṛṣṇáḥ śyāvò 'bhavat /
tásmāt tāntáḥ kṛṣṇáḥ śyāvó bhavati /
tásya_ásur evá_ájīvat //
2.3.8.2
téna_ásunā_ásurān asṛjata /
tád ásurāṇām asuratvám /
yá evám ásurāṇām asuratváṃ véda /
ásumān evá bhavati /
ná_énam ásur jahāti //
só 'surān sṛṣṭvā́ pitā́_iva_amanyata /
tád ánu pitṛ́̄n asṛjata /
tát pitṛṇā́ṃ pitṛtvám /
yá eváṃ pitṛṇā́ṃ pitṛtváṃ véda /
pitā́_iva_evá svā́nāṃ bhavati //
2.3.8.3
yánty asya pitáro hávam //
sá pitṛ́̄nt sṛṣṭvā́_amanasyat /
tád ánu manuṣyā̀n asṛjata /
tán manuṣyā̀ṇāṃ manuṣyatvám /
yá eváṃ manuṣyā̀ṇāṃ manuṣyatváṃ véda /
manasvy èva bhavati /
ná_enaṃ mánur jahāti /
tásmai manuṣyā̀nt sasṛjānā́ya /
dívā devatrā́_abhavat /
tád ánu devā́n asṛjata /
tád devā́nāṃ devatvám /
yá eváṃ devā́nāṃ devatváṃ véda /
dívā ha_evā́sya devatrā́ bhavati //
tā́ni vā́ etā́ni catvāry ámbhām̐si /
devā́ manuṣyā̀ḥ pitáró 'surāḥ /
téṣu sárveṣv ámbho nábha iva bhavati /
yá eváṃ véda //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (4)
- Original Sanskrit Texts on the Origin and History of the People of India, their Religion and Institutions — John Muir, English
- Yajurbrāhmaṇa — Sanskrit
- Altindische Grammatik — Jacob Wackernagel & Albert Debrunner, German
- Vedic Mythology — Arthur Anthony Macdonell, English