Pramāṇa · Search · About · API

Taittiriyabrahmana 2.3.9

Taittirīyabrāhmaṇa 2.3.9

Language
Sanskrit

2.3.9.1

brahmavādíno vadanti /
yó vā́ imáṃ vidyā́t /
yáto 'yáṃ pávate /
yád abhipávate /
yád abhisaṃpávate /
sárvam ā́yur iyāt /
ná purā́_ā́yuṣaḥ prámīyeta /
paśumā́nt syāt /
vindéta prajā́m //
yó vā́ imáṃ véda //

2.3.9.2

yáto 'yáṃ pávate /
yád abhipávate /
yád abhisaṃpávate /
sárvam ā́yur eti /
ná purā́_ā́yuṣaḥ prámīyate /
paśumā́n bhavati /
vindáte prajā́m //
adbhyáḥ pavate /
apò 'bhipavate /
apò 'bhisáṃpavate //

2.3.9.3

asyā́ḥ pavate /
imā́m abhípavate /
imā́m abhísáṃpavate /
agnéḥ pavate /
agním abhípavate /
agním abhísáṃpavate /
antárikṣāt pavate /
antárikṣam abhípavate /
antárikṣam abhísáṃpavate /
ādityā́t pavate //

2.3.9.4

ādityám abhípavate /
ādityám abhísáṃpavate /
dyóḥ pavate /
dívam abhípavate /
dívam abhísáṃpavate /
digbhyáḥ pavate /
díśo 'bhípavate /
díśo 'bhísáṃpavate //
sá yát purástād vā́ti /
prāṇá evá bhūtvā́ purástād vāti //

2.3.9.5

tásmāt purástād vā́ntam /
sárvāḥ prajā́ḥ prátinandanti /
prāṇó hí priyáḥ prajā́nām /
prāṇá iva priyáḥ prajā́nāṃ bhavati /
yá eváṃ véda /
sá vā́ eṣá prāṇá evá //
átha yád dakṣiṇató vā́ti /
mātaríśvā_evá bhūtvā́ dakṣiṇató vāti /
tásmād dakṣiṇató vā́ntaṃ vidyā́t /
sárvā díśa ā́vāti //

2.3.9.6

sárvā díśó 'nuvívāti /
sárvā díśó 'nusáṃvāti_íti /
sá vā́ eṣá mātaríśvā_evá //
átha yát paścā́d vā́ti /
pávamāna evá bhūtvā́ paścā́d vāti /
pūtam asmā ā́haranti /
pūtám úpaharanti /
pūtám aśnāti /
yá eváṃ véda /
sá vā́ eṣá pávamāna evá //

2.3.9.7

átha yád uttarató vā́ti /
savitā́_évá bhūtvā́_uttarató vāti /
savitā́_iva svā́nāṃ bhavati /
yá eváṃ véda /
sá vā́ eṣá savitā́_evá //
té yá enaṃ purástād āyántam upavádanti /
yá evā́sya purástāt pāpmā́naḥ /
tā́m̐s té 'paghnanti /
purástād ítarān pāpmánaḥ sacante //
átha yá enaṃ dakṣiṇatá āyántam upavádanti //

2.3.9.8

yá evā́sya dakṣiṇatáḥ pāpmā́naḥ /
tā́m̐s té 'paghnanti /
dakṣiṇatá ítarān pāpmánaḥ sacante //
átha yá enaṃ paścā́d āyántam upavádanti /
yá evā́sya paścā́t pāpmā́naḥ /
tā́m̐s té 'paghnanti /
paścā́d ítarān pāpmánaḥ sacante //
átha yá enam uttaratá āyántam upavádanti /
yá evā́sya_uttaratáḥ pāpmā́naḥ /
tā́m̐s té 'paghnanti //

2.3.9.9

uttaratá ítarān pāpmánaḥ sacante //
tásmād eváṃ vidvā́n /
ví_iva nṛtyet /
prá_iva calet /
vy ásya_iva_akṣyáu bhāṣeta /
maṇṭáyed iva /
krātháyed iva /
śṛṅgāyéta_iva /
utá mā_úpavadeyuḥ /
utá me pāpmā́nam ápahanyur íti //
sá yā́ṃ díśam̐ saním eṣyánt syā́t /
yadā́ tā́ṃ díśaṃ vā́to vāyā́t /
átha práveyāt /
prá vā dhāvayet /
sātám evá raditáṃ vyūḍhaṃ gandhám abhí prácyavate /
ā́_asya táṃ janapadáṃ pū́rvā kīrtír gacchati /
dā́nakāmā asmai prajā́ bhavanti /
yá eváṃ véda //

Commentaries (4)

Linked texts (3)