Pramāṇa · Search · About · API

Taittiriyabrahmana 2.4.1

Taittirīyabrāhmaṇa 2.4.1

Language
Sanskrit

2.4.1.1

júṣṭo dámūnā átithir duroṇé /
imáṃ no yajñám úpayāhi vidvā́n /
víśvā agne 'bhiyújo vihátya /
śatrūyatā́m ā́bharā bhójanāni //
ágne śárdha mahaté sáubhagāya /
táva dyumnā́ny uttamā́ni santu /
sáṃ jāspatyám̐ suyámam ā́kṛṇuṣva /
śatrūyatā́m abhítiṣṭhā máhām̐si //
ágne yó no 'bhíto jánaḥ /
vṛ́ko vā́ro jíghām̐sati //

2.4.1.2

tā́m̐s tváṃ vṛtrahañ jahi /
vásv asmábhyam ā́bhara //
ágne yó no 'bhidā́sati /
samā́no yáś ca níṣṭyaḥ /
idhmásya_iva prakṣā́yataḥ /
mā́ tásya_úccheṣi kíñ caná /
tvám indra_abhibhū́r asi /
devó víjñātavīryaḥ /
vṛtrahā́ purucétanaḥ //
ápa prā́ca índra víśvām̐ amítrān //

2.4.1.3

ápa_ápāco abhibhūte nudasva /
ápa_údīco ápa śūra_dharā́ca ūráu /
yáthā táva śárman mádema //
tám índraṃ vājayāmasi /
mahé vṛtrā́ya hántave /
sá vṛ́ṣā vṛṣabhó bhuvat['bhuvat?] //
yujé ráthaṃ gavéṣaṇam̐ háribhyām /
úpa bráhmāṇi jujuṣāṇám asthuḥ /
víbādhiṣṭa_asyá ródasī mahitvā́ /
índro vṛtrā́ṇy apratī́jaghanvā́n //

2.4.1.4

havyavā́ham abhimātiṣā_áham /
rakṣoháṇaṃ pṛ́tanāsu jiṣṇúm /
jyótiṣmantaṃ dī́dyataṃ púrandhim /
agním̐ sviṣṭakṛ́tam //
svìṣṭam agne abhí tát pṛṇāhi /
víśvā deva pṛ́tanā abhíṣyá /
urúṃ naḥ pánthāṃ pradiśán víbhāhi /
jyótiṣmad dhehy ajáraṃ na //
tvā́m agne havíṣmantaḥ /
deváṃ mártāsa īḍate //

2.4.1.5

mánye tvā jātávedasam /
sá havyā́ vakṣyā_anuṣák //
víśvāni no durgáhā jātavedaḥ /
síndhuṃ ná nāvā́ duritā_átiparṣi /
ágne atriván mánasā gṛṇānáḥ /
asmā́kaṃ bodhyavitā́ tanū́nām //
pūṣā́ gā́ ánvetu naḥ /
pūṣā́ rakṣatv árvataḥ /
pūṣā́ vā́jam̐ sanotu naḥ //
pūṣā́_ímā́ ā́śā ánuveda sárvāḥ //

2.4.1.6

só asmā́m̐ ábhayatamena neṣat /
svastidā́ ághṛṇiḥ sárvavīraḥ /
áprayucchan purá etu prájānán //
agne sapráthā asi /
júṣṭo hótā váreṇyaḥ /
tváyā yajñáṃ vítanvate //
agnī́ rákṣām̐si sedhati /
śukráśocir ámartyaḥ /
śúciḥ pāvaká ī́ḍyaḥ //
ágne rákṣāṇo ám̐hasaḥ //

2.4.1.7

prátiṣma deva rī́ṣataḥ /
tápiṣṭhair ajáro daha /
ágne hám̐si nyàtriṇam /
dī́dyan mártyeṣv ā́ /
své kṣáye śucivrata //
ā́ vāta vāhi bheṣajám /
ví vāta vāhi yád rápaḥ /
tvám̐ hí viśvábheṣajaḥ /
devā́nāṃ dūtá ī́yase //
dvā́v imáu vā́tau vātaḥ //

2.4.1.8

ā́ síndhor ā́ parāvátaḥ /
dákṣaṃ me anyá āvā́tu /
párā_anyó vātu yád rápaḥ //
yád adó vāta té gṛhé /
amṛ́tasya nidhír hitáḥ /
táto no dehi jīváse /
táto no dhehi bheṣajám /
táto no máha ā́vaha //
vā́ta ā́vātu bheṣajám /
śambhū́r mayobhū́r no hṛdé //

2.4.1.9

prá ṇa ā́yūm̐ṣi tāriṣat //
tvám agne ayā́si /
ayā́ sánmánasā hitáḥ /
ayā́ sán havyámūhiṣe /
ayā́ no dhehi bheṣajám //
iṣṭó agnír ā́hutaḥ /
svā́hākṛtaḥ pipartu naḥ /
svagā́ devébhya idáṃ námaḥ //
kā́mo bhūtásya bhávyasya /
samrā́ḍ éko vírājati //

2.4.1.10

sá idáṃ prátipaprathe /
ṛtū́n útsṛjate vaśī́ //
kā́mas tád ágre sámavartata_ádhi /
mánaso rétaḥ prathamáṃ yád ā́sīt /
sató bándhum ásati níravindan /
hṛdí pratī́ṣyā kaváyo manīṣā́ //
tváyā manyo sarátham ārujántaḥ /
hárṣamāṇāso dhṛṣatā́ marutvaḥ /
tigma_íṣava ā́yudhā sam̐śíśānāḥ /
úpapráyanti náro agnírūpāḥ //

2.4.1.11

manyúr bhágo manyúr evá_āsa deváḥ /
manyúr hótā váruṇo viśvávedāḥ /
manyúṃ víśa īḍate devayántīḥ /
pāhí no manyo tápasā śrámeṇa //
tvám agne vratabhṛ́t_śúciḥ /
devā́m̐ ā́sādayā ihá /
ágne havyā́ya vóḍhave //
vratā́ nú bíbhrad vratapā́ ádābhyaḥ /
yájāno devā́m̐ ajáraḥ suvī́raḥ /
dádhad rátnāni suvidānó agne /
gopāyá no jīváse jātavedaḥ //

Commentaries (4)

Linked texts (8)