Pramāṇa · Search · About · API

Taittiriyabrahmana 2.4.2

Taittirīyabrāhmaṇa 2.4.2

Language
Sanskrit

2.4.2.1

cákṣuṣo hete mánaso hete /
vā́co hete bráhmaṇo hete /
yó mā_aghāyúr abhidā́sati /
tám agne menyā́_ameníṃ kṛṇu //
yó mā cákṣuṣā yó mánasā /
yó vācā́ bráhmaṇā_aghāyúr abhidā́sati /
táyā_agne tváṃ menyā́ /
amúm ameníṃ kṛṇu //
yát kíṃ ca_asáu mánasā yác ca vācā́ /
yajñáir juhóti yájuṣā havírbhiḥ //

2.4.2.2

tán mṛtyúr nírṛtyā saṃvidānáḥ /
purā́ diṣṭā́d ā́hutīr asya hantu //
yātudhā́nā nírṛtir ā́d u rákṣaḥ /
té asya ghnantv ánṛtena satyám /
índra_iṣitā ā́jyam asya mathnantu /
mā́ tát sámṛddhi yád asáu karóti //
hánmi te 'háṃ kṛtám̐ havíḥ /
yó me ghorám ácīkṛtaḥ /
ápāñcau tá ubháu bāhū́ /
ápanahyāmy āsyàm //

2.4.2.3

ápanahyāmi te bāhū́ /
ápanahyāmy āsyàm /
agnér devásya bráhmaṇā /
sárvaṃ te 'vadhiṣaṃ kṛtáṃ //
purā́_amúṣya vaṣaṭkārā́t /
yajñáṃ devéṣu nas kṛdhi /
svìṣṭam asmā́kaṃ bhūyāt /
mā́_asmā́n prā́pann árātayaḥ //
ánti dūré sató agne /
bhrā́tṛvyasyā_abhidā́sataḥ //

2.4.2.4

vaṣaṭkāréṇa vájreṇa /
kṛtyā́m̐ hanmi kṛtā́m ahám //
yó mā náktaṃ dívā sāyám /
prātáś ca_áhno nipī́yati /
adyā́ tám indra vájreṇa /
bhrā́tṛvyaṃ pādayāmasi //
índrasya gṛhò 'si táṃ tvā /
prápadye ságuḥ sa_áśvaḥ /
sahá yán me ásti téna //
ī́ḍe agníṃ vipaścítam //

2.4.2.5

girā́ yajñásya sā́dhanam /
śruṣṭīvā́naṃ dhitā́vānam //
ágne śakéma te vayám /
yámaṃ devásya vājínaḥ /
áti dvéṣām̐ṣi tarema //
ávataṃ mā sámanasau sámokasau /
sácetasau sáretasau /
ubháu mā́m avataṃ jātavedasau /
śiváu bhavatam adyá naḥ //
svayáṃ kṛṇvānáḥ sugám áprayāvam //

2.4.2.6

tigmáśṛṅgo vṛṣabháḥ śóśucānaḥ /
pratnám̐ sadhástham ánupáśyamānaḥ /
ā́ tántum agnír divyáṃ tatāna //
tváṃ nas tántur utá sétur agne /
tváṃ pánthā bhavasi devayā́naḥ /
tváyā_agne pṛṣṭháṃ vayám ā́ruhema /
áthā deváiḥ sadhamā́daṃ madema //
úd uttamáṃ mumugdhi naḥ /
ví pā́śaṃ madhyamáṃ cṛta /
áva_adhamā́ni jīváse //

2.4.2.7

vayám̐ soma vraté táva /
mánas tanū́ṣu bíbhrataḥ /
prajā́vanto áśīmahi //
indrāṇī́ devī́ subhágā supátnī /
úd ám̐śena pativídye jigāya /
trim̐śád asyā jaghánaṃ yójanāni /
upástha índram̐ stháviraṃ bibharti //
sénā ha nā́ma pṛthivī́ dhanaṃjayā́ /
viśvávyacā áditiḥ sū́ryatvak /
indrāṇī́ devī́ prāsáhā dádānā //

2.4.2.8

sā́ no devī́ suhávā śárma yacchatu //
ā́ tvā_ahārṣam antárabhūḥ /
dhruvás tiṣṭha_ávicācaliḥ /
víśas tvā sárvā vāñchantu /
mā́ tvád rāṣṭrám ádhibhraśat //
dhruvā́ dyáur dhruvā́ pṛthivī́ /
dhruváṃ víśvam idáṃ jágat /
dhruvā́ ha párvatā imé /
dhruvó rā́jā viśā́m ayám //
ihá_evá_edhi mā́ vyathiṣṭhāḥ //

2.4.2.9

párvata iva_ávicācaliḥ /
índra iva_ihá dhruvás tiṣṭha /
ihá rāṣṭrám u dhāraya //
abhítiṣṭha pṛtanyatáḥ /
ádhare santu śátravaḥ /
índra iva vṛtrahā́ tiṣṭha /
apáḥ kṣétrāṇi saṃjáyan //
índra eṇam adīdharat /
dhruváṃ dhruvéṇa havíṣā /
tásmai devā́ ádhibravan /
ayáṃ ca bráhmaṇaspátiḥ //

Commentaries (4)

Linked texts (11)