Pramāṇa · Search · About · API

Taittiriyabrahmana 2.4.3

Taittirīyabrāhmaṇa 2.4.3

Language
Sanskrit

2.4.3.1

júṣṭī naro bráhmaṇā vaḥ pitṛṇā́m /
ákṣam avyayaṃ ná kílā riṣātha /
yát_śákvarīṣu bṛhatā́ ráveṇa /
índre śúṣmam ádadhāthā vasiṣṭhāḥ //
pāvakā́ naḥ sárasvatī /
vā́jebhir vājínīvatī /
yajñáṃ vaṣṭu dhiyā́ vasuḥ /
sárasvaty abhí no neṣi vásyaḥ mā́ paspharīḥ páyasā mā́ na ā́dhak /
juṣásva naḥ sakhyā̀ veśyā̀ ca //

2.4.3.2

mā́ tvát kṣétrāṇy áraṇāni ganma //
vṛñjé havír námasā barhír agnáu /
áyāmi srúc_ ghṛtávatī suvṛktíḥ /
ámyakṣi sádma sádane pṛthivyā́ḥ /
áśrāyi yajñáḥ sū́rye ná cákṣuḥ //
ihá_arvā́ñcam átihvaye /
índraṃ jáitrāya jétave /
asmā́kam astu kévalaḥ //
arvā́ñcam índram amúto havāmahe /
yó gojíd dhanajíd aśvajíd yáḥ //

2.4.3.3

imáṃ no yajñáṃ vihavé juṣasva /
asyá kurmo harivo medínaṃ tvā //
ásaṃmṛṣṭo jāyase mātṛvóḥ śúciḥ /
mandráḥ kavír údatiṣṭho vívasvataḥ /
ghṛténa tvā vardhayann agna āhuta /
dhūmás te ketúr abhavad diví śritáḥ //
agnír ágre prathamó devátānām /
sáṃyātānām uttamó víṣṇur āsīt /
yájamānāya parigṛ́hya devā́n /
dīkṣáyā_idám̐ havír ā́gacchataṃ naḥ //

2.4.3.4

agníś ca viṣṇo tápa uttamáṃ maháḥ /
dīkṣāpālébhyo vánatam̐ hí śakrā́ /
víśvair deváir yajñíyaiḥ saṃvidānáu /
dīkṣā́m asmái yájamānāya dhattam //
prá tád víṣṇuḥ stavate vīryā̀ya /
mṛgó ná bhīmáḥ kucaró giriṣṭhā́ḥ /
yásya_ūrúṣu triṣú vikrámaṇeṣu /
ádhikṣiyánti bhúvanāni víśvā //
nū́ márto dayate saniṣyán yáḥ /
víṣṇava urugāyā́ya dā́śat //

2.4.3.5

prá yáḥ satrā́cā mánasā yájātai /
etā́vantaṃ náryam āvívāsāt //
vícakrame pṛthivī́m eṣá etā́m /
kṣétrāya víṣṇur mánuṣe daśasyán /
dhruvā́so asya kīráyo jánāsaḥ /
urukṣitím̐ sujánimā cakāra //
trír deváḥ pṛthivī́m eṣá etā́m /
vícakrame śatárcasaṃ mahitvā́ /
prá víṣṇur astu tavásas távīyān /
tveṣám̐ hy asya sthávirasya nā́ma //

2.4.3.6

hótāraṃ citráratham adhvarásya /
yajñásya yajñasya ketúm̐ rúśantam /
prátyardhiṃ devásya devasya mahnā́ /
śriyā́ tvā_agním átithiṃ janānām //
ā́ no víśvābhir ūtíbhiḥ sajóṣāḥ /
bráhma juṣāṇó haryaśva yāhi /
várīvṛjat sthávirebhiḥ suśipra /
asmé dádhad vṛ́ṣaṇam̐ śúṣmam indra //
índraḥ suvarṣā́ janáyann áhāni /
jigā́ya_uśígbhiḥ pṛ́tanā abhiśrī́ḥ //

2.4.3.7

prā́rocayan mánave ketúm áhnām /
ávindaj jyótir bṛhaté ráṇāya //
áśvināv ávase níhvaye vām /
ā́ nūnáṃ yātam̐ sukṛtā́ya viprā /
prātaryukténa suvṛ́tā ráthena /
upā́gacchatam ávasā_ā́gataṃ naḥ /
aviṣṭáṃ dhīṣv áśvinā na āsú /
prajā́vad réto áhrayaṃ no astu /
ā́vāṃ toké tánaye tū́tujānāḥ /
surátnāso devávītiṃ gamema //

2.4.3.8

tvám̐ soma krátubhiḥ sukrátur bhūḥ /
tváṃ dákṣaiḥsudákṣo viśvávedāḥ /
tváṃ vṛ́ṣā vṛṣatv ébhir mahitvā́ /
dyumnébhir dyumny àbhavo nṛcákṣāḥ //
áṣāḍhaṃ yutsú pṛ́tanāsu pápriyam /
suvarṣā́m apsvā́ṃ vṛjánasya gopā́m /
bhareṣujā́m̐ sukṣitím̐ suśrávasam /
jáyantaṃ tvā́m ánu madema soma //
bhávā mitró ná śévyo ghṛtā́sutiḥ /
víbhūtadyumna evayā́ u sapráthāḥ //

2.4.3.9

ádhā te viṣṇo vidúṣācid ṛ́dhyaḥ /
stómo yajñásya rā́dhyo havíṣmataḥ //
yáḥ pūrvyā́ya vedháse návīyase /
sumájjānaye víṣṇave dádāśati /
yó jātám asyá maható mahí brávāt /
séduḥ śrávobhir yujyàṃcíd abhyàsat /
tám u stotāraḥ pūrvyáṃ yáthā vidá ṛtásya /
gárbham̐ havíṣā pipartana /
ā́_asya jānánto nā́ma cid vivaktana /
bṛhát te viṣṇo sumatíṃ bhajāmahe //

2.4.3.10

imā́ dhānā́ ghṛtasnúvaḥ /
hárī ihá_úpavakṣataḥ /
índram̐ sukhátame ráthe //
eṣá brahmā́ prá te mahé /
vidáthe śam̐siṣam̐ hárī /
yá ṛtvíyaḥ prá te vanve /
vanúṣo haryatáṃ mádam /
índro nā́ma ghṛtáṃ ná yáḥ /
háribhiś cā́ru sécate /
śrutó gaṇá ā́ tvā viśantu //

2.4.3.11

hárivarpasaṃ gíraḥ //
ā́ carṣaṇiprā́ vṛṣabhó jánānām /
rā́jā kṛṣṭīnā́ṃ puruhūtá índraḥ /
stutáḥ śravasyánn ávasā_úpa madrík /
yuktvā́ hárī vṛ́ṣaṇā_ā́yāhy arvā́ṅ //
prá yát síndhavaḥ prasaváṃ yád ā́yan /
ā́paḥ samudrám̐ rathyā́_iva jagmuḥ /
átaś cid índraḥ sádaso várīyān /
yád īm̐ sómaḥ pṛṇā́ti dugdhó am̐śúḥ //
hváyāmasi tvā_índra yāhy àrvāṅ //

2.4.3.12

áraṃ te sómas tanúve bhavāti /
śátakrato mādáyasvā sutéṣu /
prá_asmā́m̐ ava pṛ́tanāsu prá yutsú //
índrāya sómāḥ pradívo vídānāḥ /
ṛbhúr yébhir vṛ́ṣaparvā víhāyāḥ /
prayamyámāṇān práti ṣū́ gṛbhāya /
índra píba vṛ́ṣadhūtasya vṛ́ṣṇaḥ /
áheḍamāna úpayāhi yajñám /
túbhyaṃ pavanta índavaḥ sutā́saḥ /
gā́vo ná vajrint svamóko áccha //

2.4.3.13

índra_āgahi prathamó yajñíyānām //
yā́ te kākút súkṛtā yā́ váriṣṭhā /
yáyā śáśvat píbasi mádhva ūrmím /
táyā pāhi prá te adhvaryúr asthāt /
sáṃ te vájro vartatām indra gavyúḥ //
prātaryújā víbodhaya /
áśvināv ā́_ihá gacchatam /
asyá sómasya pītáye //
prātaryā́vāṇā prathamā́ yajadhvam /
purā́ gṛ́dhrād áraruṣaḥ pibāthaḥ /
prātár hí yajñám aśvínā dádhāte /
práśam̐santi kaváyaḥ pūrvabhā́jaḥ //
prātár yajadhvam aśvínā hinota /
ná sāyám asti devayā́ ájuṣṭam /
utá_ányó asmád yajate vícāyaḥ /
pū́rvaḥ pūrvo yájamāno vánīyān //

Commentaries (1)

Linked texts (2)