Pramāṇa · Search · About · API

Taittiriyabrahmana 2.4.4

Taittirīyabrāhmaṇa 2.4.4

Language
Sanskrit

2.4.4.1

naktaṃ jātā́_asy oṣadhe /
rā́me kṛ́ṣṇe ásikni ca /
idám̐ rajani rajaya /
kilā́saṃ palitáṃ ca yát //
kilā́saṃ ca palitáṃ ca /
níritó nāśayā pṛ́ṣat /
ā́ naḥ svó aśnutāṃ várṇaḥ /
párā śvetā́ni pātaya //
ásitaṃ te niláyanam /
āsthā́nam ásitaṃ táva //

2.4.4.2

ásikniy asy oṣadhe /
nír itó nāśayā pṛ́ṣat //
asthijásya kilā́sasya /
tanūjásya ca yát tvací /
kṛtyáyā kṛtásya bráhmaṇā /
lákṣma śvetám anīnaśam //
sárūpā nā́ma te mātā́ /
sárūpo nā́ma te pitā́ /
sárūpā_asy oṣadhe sā́ /
sárūpam idáṃ kṛdhi //

2.4.4.3

śunám̐ huvema maghávānam índram /
asmín bháre nṛ́tamaṃ vā́jasātau /
śṛṇvántam ugrám ūtáye /
samátsu /
ghnántaṃ vṛtrā́ṇi saṃjítaṃ dhánānām //
dhūnuthá dyā́ṃ párvatān dāśúṣe vásu /
ní vo vánā jihate yā́mano bhiyā́ /
kopáyatha pṛthivī́ṃ pṛśnimātaraḥ /
yudhé yád ugrāḥ pṛ́ṣatīr áyugdhvam //
právepayanti párvatān /
víviñcanti vánaspátīn //

2.4.4.4

pró 'vārata maruto durmádā iva /
dévāsaḥ sárvayā viśā́ /
purutrā́ hí sadṛ́ṅṅ ási /
víśo víśvā ánu prabhú /
samátsu tvā havāmahe //
samátsv agním ávase /
vājayánto havāmahe /
vā́jeṣu citrárādhasam //
sáṃgacchadhvam̐ sáṃvadadhvam /
sáṃ vo mánām̐si jānatām //

2.4.4.5

devā́ bhāgáṃ yáthā pū́rve /
saṃjānānā́ upā́sata //
samānó mántraḥ sámitiḥ samānī́ /
samānáṃ mánaḥ sahá cittám eṣām /
samānáṃ kéto abhí sám̐rabhadhvam /
saṃjñā́nena vo havíṣā yajāmaḥ //
samānī́ va ā́kūtiḥ /
samānā́ hṛ́dayāni vaḥ /
samānám astu vo mánaḥ /
yáthā vaḥ súsahā́sati //

2.4.4.6

saṃjñā́naṃ naḥ sváiḥ /
saṃjñā́nam áraṇaiḥ /
saṃjñā́nam aśvinā yuvám /
ihá_asmā́su níyacchatam //
saṃjñā́naṃ me bṛ́haspátiḥ /
saṃjñā́nam̐ savitā́_akarat /
saṃjñā́nam aśvinā yuvám /
ihá máhyaṃ níyacchatam //
úpa cchāyā́m iva ghṛ́ṇeḥ /
áganma śárma te vayám //

2.4.4.7

ágne híraṇyasaṃdṛśaḥ /
ádabdhebhiḥ savitaḥ pāyúbhiṣ ṭvám /
śivébhir adyá páripāhi no gáyam /
hiranyajihvaḥ suvitā́ya návyase /
rákṣā mā́kir no agháśam̐sa īśata //
máde_made hí no dadúḥ /
yuthā́ gávām ṛjukrátuḥ /
sáṃgṛbhāya purū́ śatā́ /
ubhayā́ hastyā́ vásu /
śiśīhí rāyá ā́bhara //

2.4.4.8

śíprin vājānāṃ pate /
śácīvas táva dam̐sánā /
ā́ tū́ na indra bhājaya /
góṣv áśveṣu śubhrúṣu /
sahásreṣu tuvīmagha //
yád devā deva héḍanam /
dévāsaś cakṛmā́ vayám /
ā́dityās tásmān mā yūyám /
ṛtásya_ṛténa muñcata //
ṛtásya_ṛténa_ādityāḥ //

2.4.4.9

yájatrā muñcata_ihá mā /
yajñáir vo yajñavāhasaḥ /
āśíkṣanto na śekima //
médasvatā yájamānāḥ /
srucā́_ā́jyena júhvataḥ /
akāmā́ vo viśve devāḥ /
śíkṣanto ná_upaśekima //
yádi dívā yádi náktam /
éna enasyó 'karat /
bhū́táṃ mā tásmād bhávyaṃ ca //

2.4.4.10

drupadā́d iva muñcatu //
drupadā́d iva_ín mumucānáḥ /
svin náḥ srātvī́ málād iva /
pūtáṃ pavítreṇa_iva_ā́jyam /
víśve muñcantu mā_énasaḥ //
úd váyáṃ támasas pári /
páśyanto jyotir úttaram /
deváṃ devatrā́ sū́ryam /
áganma jyótir uttamam //

Commentaries (1)

Linked texts (2)