[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 2.4.4 # Taittiriyabrahmana 2.4.4 Taittirīyabrāhmaṇa 2.4.4 - **Language:** Sanskrit ### [2.4.4.1](https://indike.org/pramana/in.veda.brahmana.taittiriya.2.4.4.1) naktaṃ jātā́\_asy oṣadhe / rā́me kṛ́ṣṇe ásikni ca / idám̐ rajani rajaya / kilā́saṃ palitáṃ ca yát // kilā́saṃ ca palitáṃ ca / níritó nāśayā pṛ́ṣat / ā́ naḥ svó aśnutāṃ várṇaḥ / párā śvetā́ni pātaya // ásitaṃ te niláyanam / āsthā́nam ásitaṃ táva // ### [2.4.4.2](https://indike.org/pramana/in.veda.brahmana.taittiriya.2.4.4.2) ásikniy asy oṣadhe / nír itó nāśayā pṛ́ṣat // asthijásya kilā́sasya / tanūjásya ca yát tvací / kṛtyáyā kṛtásya bráhmaṇā / lákṣma śvetám anīnaśam // sárūpā nā́ma te mātā́ / sárūpo nā́ma te pitā́ / sárūpā\_asy oṣadhe sā́ / sárūpam idáṃ kṛdhi // ### [2.4.4.3](https://indike.org/pramana/in.veda.brahmana.taittiriya.2.4.4.3) śunám̐ huvema maghávānam índram / asmín bháre nṛ́tamaṃ vā́jasātau / śṛṇvántam ugrám ūtáye / samátsu / ghnántaṃ vṛtrā́ṇi saṃjítaṃ dhánānām // dhūnuthá dyā́ṃ párvatān dāśúṣe vásu / ní vo vánā jihate yā́mano bhiyā́ / kopáyatha pṛthivī́ṃ pṛśnimātaraḥ / yudhé yád ugrāḥ pṛ́ṣatīr áyugdhvam // právepayanti párvatān / víviñcanti vánaspátīn // ### [2.4.4.4](https://indike.org/pramana/in.veda.brahmana.taittiriya.2.4.4.4) pró 'vārata maruto durmádā iva / dévāsaḥ sárvayā viśā́ / purutrā́ hí sadṛ́ṅṅ ási / víśo víśvā ánu prabhú / samátsu tvā havāmahe // samátsv agním ávase / vājayánto havāmahe / vā́jeṣu citrárādhasam // sáṃgacchadhvam̐ sáṃvadadhvam / sáṃ vo mánām̐si jānatām // ### [2.4.4.5](https://indike.org/pramana/in.veda.brahmana.taittiriya.2.4.4.5) devā́ bhāgáṃ yáthā pū́rve / saṃjānānā́ upā́sata // samānó mántraḥ sámitiḥ samānī́ / samānáṃ mánaḥ sahá cittám eṣām / samānáṃ kéto abhí sám̐rabhadhvam / saṃjñā́nena vo havíṣā yajāmaḥ // samānī́ va ā́kūtiḥ / samānā́ hṛ́dayāni vaḥ / samānám astu vo mánaḥ / yáthā vaḥ súsahā́sati // ### [2.4.4.6](https://indike.org/pramana/in.veda.brahmana.taittiriya.2.4.4.6) saṃjñā́naṃ naḥ sváiḥ / saṃjñā́nam áraṇaiḥ / saṃjñā́nam aśvinā yuvám / ihá\_asmā́su níyacchatam // saṃjñā́naṃ me bṛ́haspátiḥ / saṃjñā́nam̐ savitā́\_akarat / saṃjñā́nam aśvinā yuvám / ihá máhyaṃ níyacchatam // úpa cchāyā́m iva ghṛ́ṇeḥ / áganma śárma te vayám // ### [2.4.4.7](https://indike.org/pramana/in.veda.brahmana.taittiriya.2.4.4.7) ágne híraṇyasaṃdṛśaḥ / ádabdhebhiḥ savitaḥ pāyúbhiṣ ṭvám / śivébhir adyá páripāhi no gáyam / hiranyajihvaḥ suvitā́ya návyase / rákṣā mā́kir no agháśam̐sa īśata // máde\_made hí no dadúḥ / yuthā́ gávām ṛjukrátuḥ / sáṃgṛbhāya purū́ śatā́ / ubhayā́ hastyā́ vásu / śiśīhí rāyá ā́bhara // ### [2.4.4.8](https://indike.org/pramana/in.veda.brahmana.taittiriya.2.4.4.8) śíprin vājānāṃ pate / śácīvas táva dam̐sánā / ā́ tū́ na indra bhājaya / góṣv áśveṣu śubhrúṣu / sahásreṣu tuvīmagha // yád devā deva héḍanam / dévāsaś cakṛmā́ vayám / ā́dityās tásmān mā yūyám / ṛtásya\_ṛténa muñcata // ṛtásya\_ṛténa\_ādityāḥ // ### [2.4.4.9](https://indike.org/pramana/in.veda.brahmana.taittiriya.2.4.4.9) yájatrā muñcata\_ihá mā / yajñáir vo yajñavāhasaḥ / āśíkṣanto na śekima // médasvatā yájamānāḥ / srucā́\_ā́jyena júhvataḥ / akāmā́ vo viśve devāḥ / śíkṣanto ná\_upaśekima // yádi dívā yádi náktam / éna enasyó 'karat / bhū́táṃ mā tásmād bhávyaṃ ca // ### [2.4.4.10](https://indike.org/pramana/in.veda.brahmana.taittiriya.2.4.4.10) drupadā́d iva muñcatu // drupadā́d iva\_ín mumucānáḥ / svin náḥ srātvī́ málād iva / pūtáṃ pavítreṇa\_iva\_ā́jyam / víśve muñcantu mā\_énasaḥ // úd váyáṃ támasas pári / páśyanto jyotir úttaram / deváṃ devatrā́ sū́ryam / áganma jyótir uttamam // ## Commentaries (1) - [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.61.6.45) — Sāyaṇa, Sanskrit ## Linked texts (2) - [Śākala](https://indike.org/pramana/in.veda.samhita.rg*sakala.5.57.3) — Sanskrit - [Prayogaratna (Bhaṭṭa Nārāyaṇa)](https://indike.org/pramana/in.niti.dharma.prayoga.bhatta.prayogaratna-bhatta-narayana.11.2.7) — Bhaṭṭa Nārāyaṇa, Sanskrit --- Source: [https://indike.org/pramana/in.veda.brahmana.taittiriya.2.4.4](https://indike.org/pramana/in.veda.brahmana.taittiriya.2.4.4) · Pramāṇa